شبكة القناص - الموقع الرسمي للاعب ياسر القحطاني - لقاء الكابتن ياسر مع مجلة أصوات (( 1 ))

بسم الله الرحمن الرحيم

نريد أن نعرف معلومات عن بطاقة الشخصية؟ما جبتها والله..! ( قالها مازحا ) ثم أردف .. أنا ياسرسعيد القحطاني من مواليد 1982م أع** وبرجي هو الميزان.

كيف كانت طفولتك؟
لا يوجد فيها شي مميز أنا واحد من بين 9 أبناء الأوسط بينهم تحصلني لا مدلع ولا منسي الحمد لله الوالدين الله يحفظهم مو مقصرين معنا كلنا.

ما كنت تغار من أخوانك اللي ماخذين منك الدلع؟
لا بالعكس الوالد والوالده معطين كل واحد حقه بس يمكن اللي يميزني وخلاني أخذ شوية دلع هو اني جيت بعد 3 بنات فكان لولادتي فرحة عند ألأهل وتدلعت شوي بس مو كثير.

ماأسم حارتك أيام الطفولة والمراهقة؟
حارتي اسمها العقربية في الخبر بالمنطقه الشرقية ولازلت عايش فيها منذ طفولتي.

هل كنت متعلقا بكرة القدم منذ طفولتك؟
طفولتي كانت على مراحل في بدايتها ما كنت هاوي للكرة لكن بعدين بديت أمارسها.

من هم أصدقاء الطفولة؟
أصدقائي هم عيال الحاره لازلت معهم رغم مشاغلنا اللي سافر واللي مشغول بالدراسة وأنا بالكوره ، لكن يجمعنا شي واح هو المسجد دائما بعد الصلاة نجتمع مع بعض وحنا 5 أنا وفهد وسلمان الخالدي وعبد الرحمن الجنيد ونايف الحسين.

هل تذكر أول يوم لك في المدرسة؟ هل تذكر اسم المدرسة؟
أذكر ما بقى دمعة إلا هليتها ( يقولها وهو يضحك ) كنت في روضة الواحة في الخبر وكان نظامهم اتكيت وحركات أذكر الوالده لبستني الكرفته وكنت أبي المدرسة ومتحمس لها وأول ما دخلت وتركتني الوالده وراحت بكيت عليهم لحد ما قالوا لي رح لبتكم كان هذا في البداية وبعدين تأقلمت , وأذكر بحصة الرياضه كانوا يخلون نلعب الكوره باليد وأنا ما حبيت هالوضع وكانت كل ماتجيني الكوره أحطها بألأرض وألعب برجلي واسحب بالصغار وكان في اثنين من الصغار في كل حصة رياضة يجلسون يبكون وإذا جتهم المعلمة تقولهم ليش تبكون؟؟ يقولون ياسر ما يعطينا الكورة.

هل كنت مشاغبا وتضرب بالمدرسة؟
ماكنت مشاغب بس كنت أتحرك كثير يعني (ما أقر في مكاني) ما احب الجلسة.

هل كانوا المدرسين يعاقبونك على كثرة الحركةفي الصف؟
لا بالعكس ما كانوا يعاقبوني لأنهم يعرفون أن حركتي ما كانت مصطنعة وهذي طبيعة ياسر وتحصلني لو سألني المدرس وأنا ملتفت أجاوبه بسرعة لأني مركز بسمعي معه.

كنت تنضرب بالمدرسة بينك وبين الطلاب أو تضربهم؟
لا كنت في ألإبتدائي مسالم لا أطق ولا أنطق.

وبعد ألإبتدائي؟؟
طبعا بعد الابتدائي يعتبر الواحد دخل مرحلة جديده وكنت أشوف أخوي الكبير كل يوم داخلنا بمشكلة وهواش في الحارة ومشاكل هذالك الوقت لكن الشي اللي تغير بالنسبة لي من الابتدائي كنت أشوف أنه عيب أروح المدرسة ببدلة رياضة كنت أحس انه لازم ألبس ثوب وغتره لأنه اللي يلبس بدلة وقتها كان مدلع واللي يلبس ثوب يعني رجال وبعدها عاد بدت المشاكل بالنسبة لي لأني كنت أتأثر بأخوي الكبير عبد الحكيم في لبسه واللي يسويه عموما وصرت يا طاق يا مطقوق من عيال الحارة.

حدث عالق في ذهنك منذ الطفولة؟
ما أنسى وفاة صديق عزيز علي جدا درس معي من أولى ابتدائي حتى المرحلة السادسة وتوفى بعدها ( قالها متأثرا ).

كيف توجهت إلى كرة القدم حدثنا عن البداية؟
بدأت مع فريق الحارة اللي كان اسمه فريق العقربية بعدين انتقلت لفريق حواري اخر لشركة لوتو عن طريق المدرب القدير حمد الدوسري واللي كان له الفضل بعد الله لما أنا عليه الان التحقت بفريق لوتو وكان بقيادة المدرب حمد اللي كان وده يسجلني في القادسية من البداية لكني رفضت وفضلت الحواري لأني أحبها وتعودت عليها وعلى اللعب حافي وحر في الملعب بدون التزامات بعد فريق لوتو رحت تمرنت بفريق الإتفاق رغبة مني أني أتمرن في نادي وبتأثير أصدقاء لي يتمرنون في الإتفاق تمرنت معاهم لمدة أسبوع بعدها قالوا خلاص بنوقع معاك طلعت هذاك اليوم وكان فريق لوتو عنده مباراة في نادي الإتفاق وأنا طالع شافني المدرب حمد الدوسري قالي وش عندك هينا قلت أتمرن مع الإتفاق ولحظة ما قتله هالجملة ترك فيق لوتو وسحبني مباشرة لنادي القادسية وقالي أنت بالإتفاق بتسجل في الشباب وبعد سنتين بتطلع للفريق ألأول وأنا الحين بسجلك بالقادسية بالفريق ألأول مباشرة وتحت إشراف المدرب البرازيلي كابرال وبيخلونك محترف وقالي بلعب بجده ضد الإتحاد وألأهلي وفي الرياض ضد الهلال والنصر أغراني في ذاك الوقت وسجلت في القادسية.

كيف كانت بدايتك مع القادسية؟
كانت صعية جدا لأني في بدايتي مع الفريق كنت توني مسجل في جامعة البترول ولكل يعرف مدى صعوبة الدراسة فيها للمنتظمين كيف علي أنا اللي أتمرن يوميا مع النادي .. اللي سويته أني كنت أضغط على نفسي وكنت أدرس وأتمرن في النادي لحالي لمدة شهر قبل بداية الدوري وبدون استخدام الكرة نهائيا في التمرين ومع بداية الدوري دخلت مع المجموعة وقال المدرب كابرال للاعبين أن ياسر بيلعب مباراة الإتحاد أساسي يمكن تستغربون لأنه ما تدرب معاكم من شهر لكن قالهم حكاية التمرين لحالي وانضباطي في التمرين حتى انه كان يعطيني التمارين ويتركني ويراقبني من بعيد وأنا أطبق اللي يقوله بحذافيره .

هل استمرت معانتك بين الدراسة والنادي؟
حاولت أضغط على نفسي كثير ومن أول سنة لي بالنادي انضميت لمنتخب الشباب وزادة الصعوبة في الدراسة بجامعة البترول والكورة بنفس الوقت ضغطت على نفسي واستمريت حتى السنة الثانية لكني فشلت في التوفيق بينهم ورحت لكلية المعلمين قلت يمكن أسهل ومرت سنة وأنا في كلية المعلمين وبعدها انضميت للمنتخب الأول وقتها كانت كأس العرب في الكويت ولا قدرت أواصل لا في جامعة البترول ولا كلية المعلمين لكن لازال عندي اصرار كبير إني أدرس لو بنظام الأنتساب إن شاء الله.

مثلك ألأعلى في حياتك ؟
الوالد الله يحفظه.

وفي كرة القدم ؟
عالميا ماردونا وشيفشينكو اللي أحبه كثير, ومحليا ماجد عبد الله وسامي الجابر وكنت أتمنى إني لعبت في وقت ماجد لكن أحمد الله إني جيت في وقت سامي موجود وألعب بجانبه وأستفيد منه في الملعب والكابتن ماجد أيضا لايبخل علي بتوجيهاته دائما خارج الملعب .

هل تفضل أن يكونوا أبنائك لاعبي كرة قدم مثلك؟
بترك لهم الحرية التامة في اختيار أي توجه يحبونه حتى لو كان كرة قدم.

وإذا قال واحد منهم بلعب بنادي الإتفاق ؟
ماعندي مانع يلعب للاتفاق لأنه نادي كبير.

------------------------------------------------------------------------------

ان شاء الله رح أنزل الجزء الثاني قريب جدا.

ومشكورين