احـــم احــــم
الســلام عليكم
الــف مبروك عليـــكم انتهاء الاختبارات
واجـــازة سعيــده يـارب
صحــيح انها اسبوع فقط لاغير
بس الحمد لله تســوي شغل احسن من دون شي
واممم احب اقول بــعد
الــف مبروك يالشـرقيه رجعتي لــك
ويالرياض لاتزعلي اسبوع وراجعه لكـ==>ماخذه مقلب بنفسها
وقسـم اني مرضت بس عوامل التغيير بين الشرقيه والرياض
وصوتي رايح فيها ومخي منلحس
س1/ماهو سبب انلحاس مخي؟
(الاختبارات__عامل التغيير بين الشرقيه والرياض)
واكمل بعد فيني شوي هلوسه هذي المقدمه كلها عشــان بس
اذا قمت اخربط عليكم لحد يلومني
والله انا مانيب قادره اتكلم عشان اهذر هالكثر
نبلش بالسبجكت
عــولمه داخل منازلنا,,عولمه تحــيط بنا من كل جانب
غزو فكــري يجتاح عقولنا,,التطــور يجرفنا بتياره
سواء كان سلبي ام ايجابي
ارتفـاع في الاسعــار لاتعلم الي اين ستصـل؟!!!
هل هي فـي تزايد ام ستتناقص!!
نقلد الغرب بشكل اعمــى,,ندخل في تجارب ولاتهمنا سلبيات هذه التجربه
عادات وتقاليد ذهبت مــع الريح,,لااعلم اذا كانت سترجـع ام لا!!
الحــريه الشخصيه صارت اهــم شي
ممنوع احد يدخــل في الثــاني,,النصيحه الطيبه تدخــل في جهه وتطلع من جهه ثانيه
فــي السنين الماضيه لــم يخطر في بالنا ان كل هذا سوف يحدث
والان عندما نقارن زمننا بالماضي نرا
انها انقلبت الاوضاع 180 درجه
*
*
*
الجــده عمشه وابنتها نوره والاحفاد مايكل,,جاك,,سيلين
يدخــلون جــاك ومايكل ويقولون لجدتهم هااي ويرسلون لها بوسه عالهوا
(بدل مايبوسون راسها)
الجده/وشلونكم ياوليداتي؟!وين امكم نوير واختكم(ماتعرف تقول اسمها)
جــاك/والله ياتيته(جده)الماما راحت تشتري بيتزا من ايطاليا واختي راحت
لفرنســا بتزور صديقها بس مارح يطولون كم ساعه وبيرجعــوا
الجده الدمعه بطرف عينها
مايكل/وراك ياتيته شكــلك زعلانه
الجده/لابس ياوليدي اتحــسر على زمن اول كيف البنت ماتتعدى عتبه الباب
والاول ممنوع الحرمه تسوق سياره والحين طيارات يسوقون
جــاك يهمس لمايكل/وش ذهـ التخلف
مايكل/احمد ربك مالحقنا على ذاك الزمن
الجــده تعطي مايكل وجاك 10 ريال بس كذا
كعـاده الجدات
*
*
مايكــل وجاك مستنكرين الموضوع 10 ريال ماتجيب حتى علك
*
*
جـاك للجده/ياتيته تراك تحسبينها 100 انتي عطيتينا بالغلط 10
الجده/مانيب غلطانه ولاشي وش 100 من قال اني ناويه اعطيك 100انا عطيتك 10
مايكل/خليهم عندك لأن وجودهم وعدم وجودهم واحد حتى اذا بغيت مويه ماتجيب
الجده تستنكر اسلوب مايكل معها وتترحم عالماضي
جاك ماسك صوره جده وفاطس ضحــك ويسأل الجده:
هذي الصوره في وين مصورها دادي(جدي)
الجده/يوم عرسنا
جاك/هههههههههههههههههههه حسبالي حفله تنكريه
وش ذه اللبس اللي لابسه الله يهداه
الجده/ياوليدي هذا اللبس كان عندنا رسمي خصوصا في المناسبات
يعني بس تعرس نلبسك مثله
جاك/خخخ وش البس مثله اصلا ذي مسخره
وثاني شي اسم الله علي من العرس بعدني صغير عمري 27 سنه
الجده/حرام عليك في زمننا 27 سنه عنده عيال
مايكل وجاك كالعاده مستنكرين الموضوع
مايكل لجاك/عمري حياتي عندك 5 الاف ريال
بروح اشتري من بوفيه ارض السعاده
جاك/ايوه بس ترجعهم 10 الاف
مايكل/طيب اعطيني مفاتيح طيارتك لأن بساطي السحري تعطل
وتدخل الام نوير وتسلم على امها بنفس طريقه عيالها
هاي وبوسه في الهوا
ويجلسون يسولفون ويسولفون ويرن تلفون نوره
نوره/الف الحمدلله على سلامتها,,ايه ايه,,وععع,,حسبي الله علة بليسها
وش ذه؟!!,,بودي لها قاموس اسماء هديه
الجده/ايش صاير يانوير؟
نوره/تصوري سويره ولدت وسمت ولدها(نايف)
احد يسمي ولده كذا اكيد كانت بدون وعي يوم تسميه
الله لايبلانا,,وين رح جوزيف,,طوني,,توم,,ايلي
الجده/الله يرحم فيصل وخالد وسعود ونواف ومتعب وعزوز ومشاري وسلطان وسعد,,الخ
نوره مازالت مستنكره وضع صديقتها وتقول ناس ماتعرف التطور
ترجع سيلين من فرنسا ,,وتسلم عالجده بنفس طريقه العيله
*
*
نوره/ماطولتي بسرعه رجعتي؟
سيلين/ايه صديقي امه ماتت
الجده/يوووه لاحول ولاقوه الابالله واخبار نفسيته؟
سيلين/اقول لك ماتت,,تقولون اخبار نفسيته,,اكيد عال العال
بيفتح ديسكو بذي المناسبه
الجده/الله يرحم زمن الاول كيــف لقلوب طيبه والحين الحجاره تلين تحتها
سيلين/هذا التطور ياتيته
نوره لبنتها/اقول تروحين معي بكرا بسوي شعري بصبغه وردي وبحط فيه خصلات خضرا
سيلين/لا انا بكرا بروح مباراه الهلال,,بسويه ازرق وخصلات بيضا
الجده/تروحين الملعب ,,ممنوع,,حنا زمنا الملاهب ماندخلها حتى التلفزيون ممنوع نشوف المباراه
سيلين/زمنكم غير حنا تطور
الجده/تطور,,تطور,,ذبحتوني بهالكلمه ايش هالتطور ذه؟
سيلين+نوير/خلاص نعطيك دروس نخليك تفهمين التطور
بعد الدروس الخصوصيه في التطــور:
1-الجده غيرت اسمها الى جورجيا كلونيا
2-قامت تشرب معسل بالتتن
3-رشحت نفسها في الانتخابات
4-صارت احد اعضاء لجنه التحكيم في ستار اكاديمي
5-مديره اعمال مايكل واخرجت له اول فيديو كليب
6-تعلمت اصول العزف والغناء وابدعت في عزف العود
7-قامت بأنشاء اول فريق كوري للبنات
8-تزوجت صديق حفيدها جاك وجابت ولد سمته الفريدو
9-حصلت على كاس العالم في لعب البلياردو
*
*
هــذي بعض الصور الخياليه الي توقعتها للمستقبل
من يعلم,,
يمكن يصيــر,,مثل ماكان الربع والنص والريال اللي يملكه مــلك
والحين الربع والنص شي غير معترف فيه
مثل ماكان الناس يتنقلون بالحمير,,مثل الحين نستغرب لو شفنا احد راكب فوقه
ماتدرون يمكن اللي ذكرته يصير واقع في يوم من الايام
*
*
العــولمه هل انت ضدها او معها؟؟
وياليت تذكرون ايجابياتها وسلبياتها؟؟
ارتفاع الاسعار هل تتوقعون انها بتزيد ام بتنقص؟
التطور في صالحنا ام ضدنا؟
(ياليت تذكرون بعض توقعاتكم للمستقبل حتى لو كانت خياليه موب مشكله)
برايكم تتوقعون يوم بيجي نسمي فيه مثل الاسامي اللي ذكرتها؟
اللي يتمسك بعاداته وتقاليده هل يعتبر متخلف؟
(الموضوع اختياري تبي تجاوب جاوب تبي تناقش ناقش
تبي تعلق علق تبي تفضفض فضفض تبي تنتقد انتقد بصراحه بعد
بس اهم شي مافي مشكوره ولايسلمو ولاموضوع رائع)
ايش رايكم اللي يرد بمشكور او يسلمو يعطوه كرت احمر
//
تحياتي لكم/يارا
07-02-2008, 11:04 PM
[ايـش اقـدراسوي,,،,,وهذا حالــنا يابعدي,,،,,التطــور تعب قلبي؛(شبه قصه)؛]
العرض الشجري
