.. السلام عليكم ورحمة الله وبركاتهـ ..
صباح , مساء مطعم بعبق الورود .. ومشبع برائحة الجوري .. ومغلف بقرطاس الحب ..
انقلها لكم احبائي وأصدقائي اعضاء منتدى القناص ياسر القحطاني ..
قد يستغرب البعض ويتفاجئ ربما ..! ,, بأن المدعو ( متيم ) يقطن في زاوية من زوايا
المجلس الذي طالما سرد فيهـ كل قناصي ما يجول بخاطرهـ ..!
ودائماً من يريد ان يعبر عن حال أو فعل أو موقف أو شيء آخر .. يتبادر بذهنهـ
أن المجلس هو المكان الأنسب لوضع أسطرهـ في ( خباري المجلس ) / إن صح التعبير / ..!
لم آتي هنا لأجل تضيع وقت .. أو اهدار أوقاتكم الثمينة احبابي ..!
ولاكن ما لم يحتمله الصدر .. فقد يتحمل الكيبورد بعض المعاناة عندما يجسدها
في موضوع يخص هذا الشيء .. أياً كان بالطبع ..
لا أحد منا سواء ذكر .. انثى .. غني .. فقير .. ميسور .. أياً كان .. لم تمر عليه
موقف تلعب فيه ( الواسطة ) الدور الأكبر .. إن لم يكن الدور كله ..!
ولا أحد لم يسمع بـ( الواسطة ) و( بلاويها الزرقاء )
ولا يمر عليه موقف اخذت الواسطة حقه من أمام عينيه والناس ..!
ودعوني آخذ بعض المواقف التي جننتني ( ووضعت الدمع في عيني ) بعضاً
من الأوقات ..!
يوماً من الأيام التي كان فيها ( متيم ) يكاد أن يتشدق من الفرح .. فهل يلام وهو في طريقه
إلى أهله وأقاربه وجيرانه القدامى ..! هل يلام وهو يعلم ان الطائرة ستقله بعد قليل إلى ( حايل ) ..!
/ / /
ودعوني أسرد لكم القصة بتفاصيلها :-
( الساعة العاشرة صباحاً يوم الجمعة الرحلة المتجهة من ( تبوك ) إلى ( حايل ) اتجهت إلى المطار
بكامل ( كشختي 
) حاملاً حقائبي وكل ما يجول في خاطري هو متى اضم الوالدة الى صدري .. ومتى
اقبل يدي والدي واقبل رأسه ..! ولاكن ما كل ما يتمناه المرء ..! قصيت ( البوردنق ) وكل شي تمام
واحتسيت كوب من القهوة لأن موعد الرحلة الساعة ( 12,20 ص ) قبل ساعتين ومطار تبوك لم يكن
( دولي ) ليلومني أحد ..! بصراحة طفشت 
..! قهوة وجريدة وشوي العب بالجوال إلى أن حان موعد الرحلة
وأثناء توجهي لبوابة الخروج إلى الطائرة أتفاجئ بموظف في المطار يناديني ..! وقال بالحرف الواحد
[ يالغالي ممكن تجي معي شوي لمدير المطار] 
.. قلت له طيب الطائرة بتقلع هالحين ..! قال لا ما
عليك ثواني بس ..! قلت اوكي امرنا لله .. رحت معه الى المدير الي لا شفت وجهه تقول يا بعدي يا
حمد الصقور 
..! المهم قال اشوف تذكرتك .. وقعد يقرا له دقيقتين وقال يالغالي من قص لك البوردنق ..؟
قلت هذا ( وهو كان قريب مننا ) قال تعال يا ( صالح ) ودخلوا جوا مدري وش يسوون المهم أنا قلقت لأن
الطيارة تبي تقلع وعلى فكرة رحلة ( تبوك - حايل ) يوم الاربعاء والجمعة فقط ..! يعني الرحلة القادمة بعد
5 ايام ان شاء الله ..! وبكذا يكون العيد راح علينا ..! المهم جا حمد الصقور قصدي مدير المطار قال يالغالي
ما تقدر تسافر بهالتذكرة لأن ركاب الانتظار اخذوا مقاعدهم ..! انا بغيت اقوله مزحك ثقيل يالغلا 
..! قال
اعذرنا ولاكن الطيارة اقلعت الحين ..! تخيلوا الموقف ..؟ يعني انا الى الآن ما دخلت مخي ..! واحد جاي
قبل الرحلة بساعتين وقاص البوردنق من يوم ما جا .. وكل شي كامل والكامل وجه الله ..! ويجيك بكل بساطة
ويقول ما تقدر تسافر ..! انا صرت اشوف ( بنفسجي 
) ما ادري وش صار فيني ..؟ الوالد والوالدة ينتظرون ..
واخوي بالمطار له ساعة وشاريلي هدية بعد ..! ( بدال انت ما تشتريله ) رحت ادور واحد اقوله السالفة ..
وشلون ومدير المطار بنفسه هو اللي ملغى الرحلة ..! .. الشيء الغريب ان واحد مبين عليه ان الفلوس متعبته ..!
راح لمدير المطار وانا يوم كنت جالس اشوفهم يتكلمون الى ان اخذ المدير تذكرته وراح قصها بنفسه ..! وافهمها
يا فهيم ..! ,, وخلص كل شي اقدر اسويه .. لا قريب ولا بعيد .. شلت شناطي وقلت السيارة توصلنا ان شاء الله ..!
وآآهـ يالقهر ..! 
/ \ / \
الموقف الثاني ..
وهذا كأنه حلم .. شيء لا يصدق ..! كانت سيارة عاجبتني .. وكنت مخطط اني اشتريها والحمد لله رزقنا الله
بالمبلغ اللي يجيب السيارة ..! رحت لمعرض مشهور .. وكنت متفق انه يحجز لي هالسيارة .. لأن كان فيها
مواصفات عاجبتني .. وكان العدد محدود من السيارات المعروضة من نفس الطراز .. جيت له ومعي المبلغ
وخلاص الاتفاق بيننا .. وإتفاق رجل لرجل .. والرجال قليل في هذا الزمان ..! جيت ورحب فيني وقال ابد
طلبك موجود ورحنا للساحة المعروضة فيها السيارة ( وازددت فيها حباً 
) المهم يوم جينا نكتب عقد الاتفاق
ونقل السيارة بملكيتي .. ودق التلفون .. ( وياليته ما دق ..! ) الرجال حسيت ان وجهه تغير .. سكر السماعة
وقام يجيب مواضيع مادري وش تبي .. يعني يقول : بيني وبينك السيارة لك عليها شوي .. قطعها مهي متوفرة
وخرابها كثير .. ومدري وشو ..! المصيبة انه قبل هالتلفون يمدح فيها مدح موب طبيعي ..! قلت انا غير
هالسيارة ما ابي ..!
وأنا سألت عنها ومدحوها ناس جربوها ..! المهم قال هالحين فيه ضيف عندنا يبي يجي
انا استأذنك بس ارحب به وارجعلك .. والمشكلة ان المعرض مليان موظفين .. لكن شكله ( مسؤول الترحيب
في المعرض ..! ) راح الرجال تقريباً صار له نص ساعة وتاركنا على الكرسي .. واحد مصري كان مكتبه
بجوار مكتب خوينا .. اشوفه يقول مواصفات السيارة ولونها .. ولون السيارة كان هو الوحيد بين جميع الوان
السيارات .. وكان اللون ( سكري ) .. وجا الموظف اللي راح يرحب بالضيف وبكل وقاحة يقول : معليش
يالغالي السيارة راحت عليك ..! قلت له وين اتفاقنا ..؟ قال والله الامر مو بيدي انت تشوف هاللي جا تراهـ
يبي هالسيارة لولده .. وطالبها اليوم قبل باتسر ..! قلت له وآخر كلام ..؟ قال والله مقدر يالغلا لاكن ما بيدي
شي ..! ( وأترك لكم تفسير هالحادثة الوقحة على ما ترونه مناسباً ..! )
/ / / /
إلى متى ..! عندك واسطة تمشي .. ما عندك ضف وجهك ..؟
إلى متى ..! الواسطة تكسر القوانين والانظمة أمام الملأ وبدون
أي متابعة أو ردع ..؟
إلى متى ..! تسلب حقوق ناس مساكين وتضيع عليهم اشياء
حساسة من أجل واسطة ..!
إلى متى .. إلى متى .. إلى متى ..؟
نحن نعيش بـ( دين ) غير كل الأديان .. دين تسامح .. دين معروف ..
دين ايثار وكرم ..!
ليش كل واسطة تكسر كل قانون ..!
وليش كل غني يتعالى على .. ميسور .. أو فقير ..؟
وين راحت قيمنا .. وين راح ايثار آبائنا وأجدادنا ..!
وين راحت الشيم وجود النفس ..؟
ليش شخص يتعب وما يلقى .. وشخص يرتاح ويلقاها
بدون تعب ..؟
اسئلة كثيرة .. ولاكن لا جواب .. مواقف كثيرة ولاكن
لا مقتنع .. مشاكل كثير وليس من حل ..!
تجاوزات كثيرة وليس من رادع ..!
ولا زلنا نقول .. إلى متى ..؟!!
اصبحت الدوائر الحكومية تمشي المعاملات حسب الواسطة ..!
على طول عندك واسطة تعال .. ما عندك ما اقدر اساعدك ..!
طيب فيه شي اسمه نظام ..! فيه شي اسمه قوانين معمول
بها في كل منظمة ودائرة حكومية على هذا الكوكب ..!
لابد من تحرك عاجل من كل من يخصه الامر لحل هذه المشكلة ..
ولابد عليهم من تداركها واحتوائها بأسرع وقت ..! لأن الحقوق
تضيع .. وليس من عادل ..!
وأعتقد من وجهة نظري .. أن الواسطة فيها من ( الرشوة ) ولاكن
بطريقة غير مباشرة ..! يعني انت بمكانتك هذه .. الذي اعطاك الله
اياها وبإمكانه عز وجل ان ياخذها منك .. تستخدمها في تسهيل
امورك على حساب ناس آخرون .. لا يملكون شيء اسمه ( واسطة ) ..!
// // // // // //
اعزائي القناصين والقناصات .. كل شيء تعرفونه عن الواسطة .. مواقف ..
نقشات .. مشاكل .. حلول .. تعليقات .. اتمنى ان نتداوله ليساعد بعضنا الآخر
في حل تلك المعضلة التي لو كانت رجلاً ( لقتلته ) ..!
وكل واحد يبدي رأيه وانطباعه عن هذي المشكلة وهل هو مؤيد او معارض
لها .. وهل هو يستخدمها او تستخدم ضدهـ ..! وهكذا ...
تقبلوا تحياتي وتقديري .. وآسف على الاطالة .. واتمنى ان اكون قد
صافحت كل من ينتمي الى المجلس بأول موضوع جاد لي في هذا القسم ..!
اعذب وأرقى التحيات 
24-10-2007, 04:24 PM
!.. ][ الواسطة ][ ..!
العرض الشجري
