.
.
الســلام عليكم ورحــمة الله وبركــاته ..
.
.
.
يالله حي القناصات والقناصين.. وش مسوين بهالجو اللي مدري وش يبي..؟؟
والله ياهو يلعب بنا .. مرة ألبس شتوي ومرة صيفي
آخر شي طفشت صرت آخذ يلوزتين ,, وحدة شتوية والأخرى صيفية .. 
,
’
,
’
بصراحة أنا اليوم حالتي النفسية والجسدية تعبانه شوي
<= ماتزين المواضيع إلا إذ صرت تعبانه ؟؟
صــار لي يومين وثلاث دقايق ونص ثانية وانا منب أنام مثل الأوادم ..
أكيد تدرون ليش اللي يعرف يرفع رجله .. 
.
.
لاوالله الصدز إني أفكر بالكلمة اللي قالتها وحدة من البنات بالمدرسة لها سنة ماشافتني !!
قالت لي : يحليلك يالنظرهـ أنتي نفستس ماسمنتي ؟!! كأنك مسواك !!!
اهئ اهئ .. أنا قريت مقالة باحدى المجلات اللي تحدثت فيها عن البنت السمينه اللي تسخر
من البنت النحيفة .. والله وقعت على الجرح .. يعني مايدرون أن كل إنســان مثل مافيه
محــاسن فيه عيوب ؟!!
.
.
إن كان الواحد سمين قالوا كورة !! وإن كان نحيف قالوا عمود كهرب !! وإذا كان قصير
قالوا اتق شر من اقترب من الأرض !!! ونصحوه ياكل موز عشان يطول !! إن كان
أسمر قالوا : بلون الكاكاو , .............. مايتركون أحد بحاله ابد ..
ويظنون ان الناس ماعندهم مشاعر ..؟؟!
.
.
ماسمعوا قول الشاعر في قصيدة قريتها باحد المنتديات ... يقول :
أمس الضحى في تالي الليل ونيت ** ياربعنا تدرون أنا ونيت ليش ؟؟
محبوبتي يوم اطردتني من البيت ** قالت : تقلع يابو خشم تقل فيش !!!
- طبعا محبوبته زوجته !! لاتروح أفكاركم هنا والا هنا !! –
شوفوا هو كيف متأثر مع انه من طوال الشوارب , رجال ولا كل الرجاجيل
كيف أجل البنات الرقيقات المرهفات الحس مثلي ؟؟!! 
.
.
شوفوا الثاني وش يقول :
لي صاحب لاضحك قبل أمس ** تجمعت شفايفه عقب باتسر !!!
بالله تتوقعون ماتأثر صقيقه بهالوصف , ويمكن مايضحك أبد و
تكون عنده ردة فعل عنيفة ويتعقد ومايعرس أبد !! ويآخذ وحده
عمياء عشان ماتشوف شفايفه !! 
.
.
بنت خالتي خشمها نايم شوي يعني " منسدح " وإذا تخانقوا هي
وأخوها قال لها من اللي صاك الباب على خشمتس ؟؟ يسخر فيها
يعني هو مايشوف نفسه؟؟ شعره مفلفل مثل غابات السافانا ..
( مدري من وين جايبتهم خالتي هالأوادم )
عاد بنت خالتي تعقدت من الأبواب .. ماترتاح إلا إذا كان الباب
مفتوح على مصراعيه ....
.
.
أنا دايم يقولي أخوي وجهتس تقل تفاحة !! عاد أقوله أحد يحصل التفاحة
مابه أجمل منها 
.. يقولي لاأنتي تفاحة محروقة <= الحمدلله على نعمة العقل
دايم يقولون لي ردي عليه .. أقولهم خِسران التسلب سنة !!
<= إلا قولي مابه شي أتطنز به ,
.
.
مثال ثاني .. بنت خالي The warm heart
هي طويله مشالله دايم يقولون لها يالفيصلية .. ولا جدتي تسميها طويلان ..!!
عاد هي ماتطق خبر .. مرة أخذت تنورتي بتلبسه هي قصيرة علي شوي
ويوم لبستها صارت تحت الركبة بشوي .. وأقعد أتطنز به ..
وتعطين هذيك النظره اللي خلتني أنطرم ..
(( تراي مب راعية تطنز بس غصب علي تطنزت ))
.
.
. والله أنا متأثرة بالحيل من هذا , كل ماقرات قوله سبحانه وتعالى :
(( لايسخر قوم من قوم عسى أن يكونوا خيرا منهم ولا نساء من نساء
عسى أن يكن خيرا منهن )) أقول وين الناس عن هالآيه ؟؟!! يعني
لاتسخرون من أحد يمكن يكون عند الله خيرا منك ..!!
.
.
والحين بعد مافضفضت شوي أحس براحة نفسية وسعادة ..
خوذوا الواجب بعدين اطلعوا للفسحة ..
.
.
*/ ماهي نظرتك للإنسان الساخر ؟؟
*/ هل توافقـ / ـين مقولة مايسخر إلا الناقص ؟؟
*/ قد مر عليك موقف مع السخرية ؟؟
*/ أنتـ / ـي من النوع اللي يتطنز بالناس ؟؟
،
’
أخــــيرا ,,
وكيــف أهــرب منه إنه قدري
هل يملك النهر تغييرا لمجراه ..!!
(( نزار قباني )) 
.
.
بانتظــاركم ,,, وسامحونن على القصور..
CC
.......
23-03-2007, 05:09 PM
وحدة تقول لصديقتي : سنونك تقل ظغاطات مسجل !!
العرض الشجري
