*
*
*

بسم الله الرحمن الرحيم
السلام عليكم ورحمة الله وبركاته


( المدخل )



في ضحكتي تاهت الأحزان ,,,
في آهتي رجاء وأمل في لأخي( الأنسان ),,,

لك أنادي هذه يدي ممدوه
نشيــد حبـا لا نمل ترديده






انا بصراحه هالموضوع في بالي من فتره طويله وكل ماجيت اطرحه اجله
يمكن من هالأبيات اللي فوق بينت شي بسيط من المعنى ويمكن احد تطرق
له غيري , لكن هي بالنسبه لي ( رساله ) و ( الرساله أمانه ) وأبي ابينها للجميع
رساله حن لها ( الكافر ) قبل ( المؤمن ) للأسف , وهذا واقع بعض اللي في مجتمعنا !

رساله من فئه عزيزه علينا وغاليه على قلوبنا رساله للأسف تعكس سلبيات
مجتمع واعي ومجتمع متعلم ( وهي المصيبه ) ماأبي اطول في المقدمه لاني
بطرح عنوان الرساله ( رسالة من معاق ) رساله من ناس عانوا وعانوا الكثير
من هـ المجتمع عانوا من ( النظره السلبيه ) لهم في هـ الحياة وكنهم ولا شي !




( من هم المعوقين ,, او ماهي الأعاقه ) !!


إن جينا ( للمعوقين ) : هم أشخاص أصابوا بـ ( بعجز ) أو ( عدم مقدره ) أو ( خلل وظيفي )
إن جينا ( الأعاقـــه ) : هي حالة من عدم القدرة على تلبية الشخص لمتطلبات أدءا دوره بشكل طبيعي في الحياة بشكلها العام .

والأعاقات تختلف طبعا من شخص وشخص تخلتف من ناحية ( شدتها ) ( حجمها ) ( مكانها )
ولكل إعاقة برنامج خاص وطرق علاجيه خاصه ولكل معاق طريقة في التعامل بوجه العموم
وللمعوقين( عالم ثاني ), يمكن أكثرنا يجهل عالمهم , وبعضنا مافكر فيهم من الأساس ولا عبرهم
والبعض مصنفهم ( شريحة مهيب محسوبه من المجتمع ) او ( تكملة عدد , ولا منهم أي فايده )

أنا كـ شخص كنت ماعرف عنهم شي ولو واحد قالي ( وش نظرتك للمعاقين ) بقول ( خبري خبرك )
دخلت في عالمهم ودرست وناقشت وعايشتهم لفترات طويله المتخلف والأصم والمتوحد وغيره
بالبدايه واجهة صعوبه في التعامل معهم , مو لاني ماعرف عنهم شي أو اني أول مره اجتمع بهم
السبب ( سلبية تعاملنا معهم ) ماتقبلوني كوني انسان عادي , كوني واحد من اللي حاط ( اكس) عليهم
شوي شوي لحد ماعرفوا ( وش انا أبي منهم ) وش ( هم يبون مني ) وان غرضي تطوعي بس
فـ تعالمنا السلبي معهم كون فيه سلبيات كثيره بعضهم يحب ( العزله ) والثاني ( نفسيته دمار )
والسبب ( حنا ) تجاهلنا لهم وعدم اعترافنا فيهم غلط كبير منا , والله يافيهم مواهب مهيب عندنا
وامكانيات وطاقه كبيره عنده بس من يصقل هالموهبه ويعترف بها ويعتز فيها قدام الناس (مافيه)



( عالة على المجتمع )



هالكلمه اسمعها دايم , الين يومنا هذا وانا اسمعها , حنا اللحين اكثرنا متعلم ويعرف كل شي
بس ماطرى عليه يفكر في هالفئه ولو فكر والله ان يدري انه غلطان وانه يحس باللي يحسون به
لكن مدري وش اللي يمنع من التفكير , انا ماقول فكر انا ابي تعامل يدل على وعيك ومعرفتك
ابي تعامل يخلي ( المعاق ) مايحس بـ إعاقته , ليه كل ماصادفنا شخص معاق قلنا ( خله على جنب )
وليه نقول انه ( عالة على المجتمع ) في اعتقادي العاله صاحب هالتفكير ولاهوب المعاق نفسه
قبل لاتقول هالكلمه السلبيه ارجع وناظر وش قدموا المعوقين شف الأعمال وش الأبتكارات
الغلط انك تحكم على شي انت تجهله , ماتدري وش اللي يصير فيه وتحكم عليه والله ( سمعت يقولون كذا )
ماذبحنا الا يقولون كذا ! ( وكالة يقولون ) ماخلت شي اهم شي يقول ويقول وهو يجهل وش يقول
( المعوقين ) مانقدر نقول عليهم ( عالة على المجتمع ) او بالأصح ( ذوي الأحتياجات الخاصه )
بشكلهم العام فئه نفتخر فيها , لهم انجازات كبيره في المجتمع واكثر خارج المجتمع و شرفونا ..



( المعاق انسان )



المعاق انسان مثلي ومثلك ( لكن مجرد مانقول معاق ) الظن يروح انهم ناس انتهت صلاحيتهم
كلمة ( معاق ) هي اللي دارجه اللحين بين الناس حتى لو كان نوع الأعاقه شي بسيط ومايذكر
( الأصم ) : نقول عليه معاق , مثلنا يفكر ويروح ويجي لكن مايسمع ولا يتكلم وبعضهم يتكلم
( الأعمى ) : نفس الشي مثلك ويمكن احسن منك في كل شي , لكن خذ الله منه نعمة الأبصار !
( فاقد العضو) : شخص فقد يده رجله مشلول كليا . لكن راسه صاحي يعطي وياخذ وله فايده
اللي ابي اوضحه من خلال هالفقره ( المعاق انسان ) ان مو كل اعاقه تعيقه عن الأدا بشكل نهائي
الأصم يحتاج لتواصل ( بلغة الأشاره ) الأعمى ( بالأرشاد المحسوس ) او انك تكلمة وتوضح له
وغير كذا الله معوضهم بس محد يكتشف هالشي الا اللي يعاشيهم ومع معايشتهم بتفكر(صح )
ولا تعتقد ان ( المعوقين ) مايحسون باللي حواليهم , بالعكس يحس من تعابير وجهك ونظراتك
وشي بصدره كاتم عليه لانه مايدري كيف يوصله لك والسسب حنا بتصرفنا ( مانعطيم أي بال )
لازم نغير هالتعامل وبـ أسرع وقت ممكن ( ان ماخذناها من جانب الأنسانيه فيه الجانب الديني )



( مشاهد من حياة المعاقين )



لو فتشنا في حياة ( المعوقين ) بلاقي مشاهد كثيره تعكس نظرتنا لهم وتعكس تفكيرنا السلبي ..!
أقولها وبالفم المليان ( المعاق مبدع ) ( المعاق متميز ) ( المعاق اعجوبه ) ( المعاق متمكن ) ...
مشهد شدني في مهرجان ( الجنادريه 28 ) في قسم ( التأهيل ) الخاص بذوي الاحتياجات الخاصه
انسان متخلف عقليا , وجتمعين حوله انواع البشر انا شدتني هالزحمه وعلى هالقسم بالذات ( لقافه فيني )
المعاق هذا يسأله شخص يقوله في عام 1428 في شهر 6 يوم 10 أي يوم يوافق . يعطيك اليوم الصحيح
يرجع ويسأله يقول في عام 1426 في شهر 4 يوم 22 وش يوافق يقول المعاق يوم كذا وصح
شفتوا لاقالوا ( لله في خلقه شئون ) وغيرها مشاهد كثيره بس انت دور وناظر بنفسك واقتنع
كاس العالم من جابه في عام 2006 ( ذوي الأحتياجات الخاصه ) .خلونا نحترمهم ونتفختر فيهم
الدول الغربيه حاطه لهم شان عظيم وانظمه وقوانين , وياويل اللي يقول فيهم حرف واحد بس
وحنا هنا ( حدث ولاحرج ) لا احترام , لا رحمه , لااعتزاز , لاعتراف , بس متجاهلينهم .!!



( إشراقه أمل )



بعد الشيل والحط والدراسات والبحوث والتقييم أسست المباني ومراكز الرعايه في كل مكان
وبدوا يلاحظون ( هالفئات ) في ظل هـ التطور . الحكومه والحمد لله ماقصرت بأي شي أبدا
وفرت ومع ان فيه نقص الا انها توفر لحد اللحين وبدى يظهر لنا كادر قوي من اهل التخصص
واللي وفر كل وقته في خدمة فئه ( ذوي الأحتياجات الخاصه ) التطور ملحوظ بشكل كبير
وأوجدت البرامج ( الفعاله ) ذات التأثير الجيد اللي تعكس ايجابيتها على ( المعاق ) نفسه
ومع هالحرص راح يحس ( المعاق) بأهميته ووجوده في هـ المجتمع ويبتدي يمحى من مخيلته
النظرات اللسلبيه الي كان عايشها وبعضهم لازال يعيشها , لكن مافيه شي مستحيل وراح يسود
بأذن الله ادوار المجتمع وبشكل ايجابي في تغيير ( المفهوم السلبي ) خطوه بخطوه لمستقبل مشرق



( التوعيه العامه )



مانختلف على ان كل مجال له ( توعيه وفعاليات) مختصه به وكذالك هالمجال فـ أنا
أشوف ان المفروض نفعل التوعيه فيه بشكل اكبر وبشكل جدي انا وانت وانتي والكل
ليه مانسهم في هـ المجتمع بتوعيته , انا ماأطالب احد انه يقرى ويدرس ويجتهد فيه
كل الي نبيه اذا شفنا مثل هالتصرفات ( السلبيه ) من احد نعرفه نحاول نبين له انه ( غلط)
وان هاللي تعيب فيه ومخليهم ( صفر على الشمال ) له بصمه واضحه في مجتمعنا ككل
مو ( نشوف الغلط ونسكت عنه ) نحاول نعدل ,فـهم بالأخير منا وفينا لكن الله ( ابتلاهم )
بـ الاعاقه اختبار ( دنيوي ) وعظه وعبره ( للأ نسان السوي ) عشان يحس بالنعمه اللي هو فيها



( ناقش معي )




@ انت ,, ياللي تقرى الموضوع , هل حسيت بأنك فعلا قصرت معهم ؟
@ قد صادفت مواقف مع احد قلل من قيمة هـ ( الفئه ) ولا حسب لهم حساب ؟
@ قد فكرت في ( اصحاب ذوي الأحتياجات الخاصه ) وعندك فضول للدخول في عالمهم ؟
@ رأيك الشخصي في هـ( الفئه ) وهل انت مقتنع فعلا , بالأدوار اللي يقومون بها ؟
@ تشوف انه موفر لهم كل شي أو مازال النقص موجود ؟
@ مساحة خاصه لك قل اللي تبي فيها ؟


*
*
أخير الموضوع . جاء من شي شفته . ومن معاناة معاق كتبت هاللي طلع معي .. واعذرونا ع القصور
*
*
وتحملوا فلسفتي هـ المره