.
.
.
.

يا الله حيهم
كل عام وانتم بخير وينعاد عليكم بالصحه و العافيه.
وبالنسبه للي حجوا هالسنه نقول لهم حج مقبول ان شاء الله و ذنب مغفور .
استمرار لسلسلة روبنايات الي اطرحها في المجلس اطرح اليوم الجزء الثالث
وللعلم ان هذه السلسلة عباره عن مجموعه من الأفكار الي تكون محور هواجيسي
يعني ما يكون لها فايده او ما تعجبكم لذلك وجب التنويه .

. . : : الرياض : : . .

بالرغم من عصبيتي و عنصريتي للمنطقة الشرقية ولكل ما هو شرقي
وبيني وبين الرياض عداء اللهم يا كافي مع اني نجدي .
ولولا غلاة أهلي و أصحابي ونادي الهلال و الا تسان ما طبيتها .
و مدينة الرياض أيضا تبادلني العداء .
أول ما جيت استقبلتني بحمى قاسيه الله لا يوريكم ما صحيت الا ثاني العيد
فكانت رحلتي للرياض هذه المره عباره عن زياره متكرره للمستشفيات
والمستوصفات ولو درا عني د. المانع وظفني في الصحة .
بالعادة أحن على أمي خلونا نمشي ويكون ردها كالعاده رح انت
ما بعد تهنيت بأهلي .
كنت أفارق الرياض و ضحكتي تشق وجهي وليلة الرجوع للشرقيه
كنت اقيم الافراح و الليالي الملاح فرحا بمقدمي لمدينة الخبر
وملاذي الظهران .
إلا هذه المرة , المرة الوحيدة التي حزنت فيها عند مفارقة الرياض
المره الوحيده التي تمنيت ان ابقى فيها للأبد .
المره الوحيده الي قلت فيها وداعا يا الحبيبة وداعا يا الرياض .

الرياض :- لنا لقااءت أخرى بإذن الله .
.
.

. . : قصر بدون حمام ما يسوى : . .

خخخخخ عنوان يحوم الكبد صح بس ما فيه الا هذا المدخل
وهي مقوله للفنان طارق العلي في مسرحية صح لسانك .
أنا من الناس الي يعشقون السفر عن طريق البر ومسكة الخط عندي متعه
خصوصا مع أهلي جنبي اميمتي تصدر تعليماتها بالانتباه و عدم السرعه
وتمد لي بيالة الشاهي الله يجزاها خير ولا يحرمني منها ولايحرمكم من امهاتكم يا رب
وفي المرتبة الخلفيه اختي تسولف علي و انا اسولف عليها
واخواني الصغار يلعبون ويطامرون بين المراتب . متعه ما بعدها متعه
لكن المشكلة اذا طلب منهم أحد الحمام ( أعزكم الله ) .
بحكم خبرتي باستراحة الخطوط و المحطات فإن حمامتها للأسف
أقل ما يقال عنها انها قذره ويمكن القذاره انظف .
من الابواب المكسره الى الروائح القذره حمامات بدون اي صيانه
بدون ماء حتى .
هل المسؤوليه تقع على مالكي المحطات والاستراحات
على وزارة المواصلات على من تقع المسؤولية بالضبط .
هذا بالنسبه في السفر أما داخل المدن فالمصيبة أعظم فالحمامات العامه
معدومة عندنا ليش ما تدري .
يعني الي في الديره ما يحتاج مثلا وهو طالع والا وهو جاي
يمكن الرجل يقدر يدبر عمره يلفز في اقرب برحه والا عماره تبنى .
لكن النساء مساكين وش يسوون . الاطفال نفس الكلام وش يسوون
أعتقد ما فيه اي مشكله توفير حمامات عامة للناس وخلوها حتى بمبالغ رمزيه
ريال ريالين , عشان توفرون مبالغ الصيانة ,
بس ارحمونا تكفون و ارحموا عيالنا , بعدين هذي طبيعة جسم الانسان والا تبونا نغيرها .
.
.

. . :My super Ex-Girl friend : . .

فيلم كوميدي رومنسي شفته من فتره و موضوعه شدني
هذا رجال تعرف على بنت حليوه و هاديه تمشي وتباري الساس
لكن طبعا هذي البنت بطله خارقه تنقذ العالم .
طبعا شخصيتها كانت مجهوله بالنسبه للرجال لين هي علمته , مع مرور الايام
اكتشف فيها طبع الغيره الشديده وانه ما يحبها او مهيب الي يبيها .
طبعا صرح لها بالشي هذا فكانت ان النتيجه انه ورته نجوم القايله .
اعدمت سيارته , رمت عليه سمكة قرش في غرفته , وعرته قدام مدراء شركته في اجتماع مهم
يعني انفصل من دوامه .
طبعا الي جلست افكر فيه اقول لو حريمنا فعلا لهم قوه خارقه وش بيسوون .
هل نبدأ نحن الرجال بالتفكير بجديه وننشئ مؤسسة لحماية حقوق الرجل .
هل نربط احزمه على ثيابنا بحيث ما نتفاجئ اننا جالسين في الاجتماع من غير هدوم .
أعتقد المرأة ليست بحاجه الى قوة خارقة عشان تقلب حياة الرجل لجحيم
وتنكل فيه و ترويه نجوم الظهر .
المرأة بطبعها حبيبه و هاديه لكن في دقايق تنقلب الى لبوه شرسه الله يعيذنا منهم اذا زعلوا
و عقاب المرأه لا يمكن تخيله فهو عقاب مادي و معنوي في نفس الوقت .
للذلك انصح اخوتي الرجال انهم يقضبون ارضهم ويصبرون .
الحياه صعبه بدون المرأه مثل ما هي صعبه مع المرأه.
و أبعد عن صاحبة القوة الخارقة يكون افضل .
.
.

. . : ترويقه : . .

اترككم الآن مع مقطوعة موسيقية للعبقري Yanni وعنوانها

One Man's Dream

و علموني رايكم .
.
.
.
في أمان الله