يقول المثل الصيني ( الي يشوف مصيبة غيره جعل عيونه تخفس )... ويقول المثل الياباني ( الي يشوف مصيبة غيره ..............................) ... ويقول المثل الايراني ( الي يشوف مصيبة غيره وتجوز له ياخذها عرفي ) ... ويقول المثل الامريكي (الي يشوف مصيبة غيره وما يأيدنا ترا بيجيه اعظم منها
الي حبيت اقوله من خلال المقدمه السابقه والي مالها سنع …. ان مثال الي يشوف مصيبة غيره تهون عليه مصيبته معروف في كل العالم … وما يخفف مصايب الناس الا هو بعد الايمان بالله
قبل 3 سنوات طق تنزانيا الفقر والمجاعة والأمراض … ومات نصهم … وقعد النص الثاني يحترون البنك العقاري ههههههه يحترون موتتهم معنوياتهم ونفسياتهم صارت مثل معنويات الهريفي في فلم ليلة القبض على نادي النصر
قرر العلماء اخراجهم من مصيبتهم … وطبقو المثال السابق بحذافيره علشان يهونون عليهم مصيبتهم … جابو لهم شريط فيديو عن الشيشان والبوسنه والهرسك وعن القنبله النوويه الي ذبتها البحرين على اليابان … وعرضوا لهم شريط فيديو لاحلام يومها طقاقه وعرضو لهم قصة اعتزال ماجد … لكن لاحياة لمن تنادي … يوم شافو الاشرطه دنقو روسهم في الارض وبقت نفسياتهم ومعنوياتهم على ماهي عليه
صرح حينها العالم الامريكي جاك وليم تصريحه الي هز اركان البشريه … وادى الى قطع علاقات امريكا مع معظم الدول … وذلك عندما قال (بالطقاق ياسعيدان )
وحمق العالم الصيني شونق على التنزانيين … وقام يتفلت يقول والله لتوطاهم بالسياره … وياله مسكوه الرجاجيل
واجتمع العلماء وقرروا ان حالة التنزانيين مستعصيه … وقالو خلاص بنغادر البلاد … مافيه شي ماسويناه معهم ولا نفع
وقبل مايطلعون من الاجتماع … قام العالم السعودي وقال انا الي ابخليهم يرجعون مثل اول واحسن
فققوا العلماء اثاميهم … وقام بعضهم يتطنز بالعالم السعودي … لدرجة ان العالم الكوري قال ياشيخ طييييييييييييييييير طبعا من زود التطنز والاستهتار … وقال العالم الايطالي والله لو نجحت معهم لغير اسمي لمنيره
وبعدها ضرب العالم الامريكي بيده على الماصه بقوه وصرخ ياشباب ياشباب … ارجوكم ارقعوا لكراسيكم … ثم شاور بيده على العالم السعودي باحترام وتقدير لشجاعته وثقته بنفسه … وقال ورينا وش عندتس ياحمده
قام العالم السعودي وجمع التنزانيين وقال لهم احنا في السعوديه انعم الله علينا بالاسلام والبترول والقاده
ولكن هل تعلمون اننا اكبر شعب مبتلى … نعم نحن اكبر شعب مبتلى وواجهنا المصيبه والبلوى التي بلانا بها رب العالمين بالصبر وبحمد الله الذي لايحمد على مكروه سواه …. المهم الرجال شدهم كلهم … التنزانيين والعلماء الجميع يبون يشوفون وش هالبلوى … وقال العالم السعودي اكيد كلكم تبون تعرفون وش هالبلوى والمصيبة الي انا اتحدث عنها …. وفتح شنطه معه وطلع منها اشرطة فيديو للدوري السعودي وعرضها عليهم … وما بعد امدى التنزانيين يشوفون خمس دقايق من اول شريط الا وهم طامرين يصايحون الحمدلله الحمدلله الحمدلله … ومن يومها والتنزانيين من انشط الناس واحسنهم معنويات
ماقلت لكم من شاف مصيبة غيره هانت عليه مصيبته …. يامخرجينا الى متى بنصبر ؟؟؟؟؟ استغفر الله بس
ــــــــــــــــــــــــــــــــــ
مانقول لمخرجينا الا الحمدلله الذي لايحمد على مكروه سواه ….. وانا لله وانا اليه راجعون … وجعلكم تكفير ذنوب
ــــــــــــــــــــــــــــــــ
طبعا كل مخرجينا معهم ماجستير في رفع الضغط عن طريق الاخراج
ــــــــــــــــــــــــــــــــ
الزبده
ـــ
اعتقد ان الحل بسيط جدا وهو انتداب أي مخرج من مخرجي مباريات الدوري الانجليزي وباي ثمن لمدة عام … يقوم خلال هذا العام بتدريب مخرجينا وتوجيههم … واعتقد ان النتائج ستكون اكثر من رائعه
الى متى ونحن نعاني من الاخراج التلفزيوني
أخوكم البشري
.:.:.:.:..:.:.:.:.:.:.:.:.:.:.:.:.:.:.:.