.
.
.
.

(عيوني تطلع شرار ، من حضرتها تأمر أخوي)

جا محمد ومعه منجا وحده بس وعطاها بنت خالي ..
أنا : ليش ما جبت لي
محمد : ما قلتي لي

(راح يجيب لي بس ما لقا ، خلصت المنجا)

بعدها ناظرت بنت خالي وهي متوهقه وشلون تاكل المنجا ، وما معها سكين تقطعها ..
فرتها وفرتها بيدها لين أنفتحت وبدت تاكل بوسط البركة ..
المنظر كان مقزز للغاية ، خصوصاً وأن المنجا جا عليها شوي من الموية حقت البركة
(تخيلوا بركة طاب فيها سبعين بزر ، وشلون بتكون نظافت مويتها)
بنت خالي بعد ما انتبهت اني أناظرها بقرف ، وتحسبني غايرة : حرررررررررررره ، ما معك منجا
أنا : وع أصلاً ما ابي
بنت خالي تاكل بطريقة تحاول تغايرني بها وتطيح سعابيلي ، وهذا ما زادني الا قرف
أنا : وع جت الموية عليها
بنت خالي : أحلى ، تغسلها (وتغطسها في الموية)

أنقرفت أولاً ، ومليت من السباحة ثانياً ، وطلعت من البركة متوجهه لقسم الحريم (البيت الثاني)
كانت أمي بانتظاري ، وبكل عصبية : شاطره ، كان ما طلعتي
أنا ببراءة : وشو ؟!!

صراخ وهواش والسبب بكل بساطة أن الشمس حرقتني وصرت على قولت أمي (كحيله)
دخلتني أمي تروشني وبدون نقاش بدت تفرك جسمي بصابون (تايد) من القهر الي فيها مني

بعد ما طلعت من الحمام ، كل البزران كانوا طالعين ، وأمي بدت تلاغيهم
أولاً : لأنهم سابحين في ذا القايلة وصايرين زرق من حرقة الشمس لجلدهمثانياً : لأنهم ما خذوا لهم شور بعد موية البركة الوصخة


ما يستـــفاد من سالوفه 1 /p10
* اسمع كلام أمك لانها أدرى بمصلحتك ، وأكثر الناس خوفاً عليك وإن كان ذلك بالقسوة
* علم أخوانك أنهم قبل ما يجيبون للناس يجيبون لك (تجيبون لبعضكم)
* لازم نعلم صغارنا ما يستخدمون أسلوب " بأقهرك وأتحداك تقهرني " ، لأن هالأسلوب ما يولد الا الحقد والكره في نفوس صغارنا

.
.

+ سالوفه 2 :
في صغري كان عندي خروف ، في الحقيقة شاة ، كان هدية من p9 جدتيp9 الله يحفظها ، وكنت أحبه رغم أني ما شفته الا مره أو مرتين بالكثير..
مره جانا خالي يقول أن الشاة طلعت خروف ، تحطمت آمالي ، وكل أحلامي (أن يكون لي قطيع من الخرفان)مدري من لعب بمخي وأقنعني ابيعه لخالتي (الي كانوا يبون خروف يذبحونه وياكلونه) ، وفعلاً بعته بأبخس الأثمان ،
وإلى اليوم وأنا أعظ أصابع الندم ، لأني ما بغيته يموت بالذبح


ما يستـــفاد من سالوفه 2 /p10
حافظ على ممتلكاتك التي تميزك عن غيرك من أقرانك ، لا تتخلى عنها مهما كانت المغريات ، خصوصاً إن ورثت تلك الممتلكات من شخص عزيزp9


.
.

+ سالوفه 3 :
لأني بنت أمي ، ممنوع علي السباحة في الظهر إلى آخر العصر..
ذاك اليوم كان (خالد) ولد خالي (معنقز) = (فيه عنقز) ، وكان ممنوع من السباحة عشان ما يعادي البزران الثانين
قام بكل عناد (وهو الي أكبر من البزران كلهم) وطب في البركة ، وبدا يسبح
في آخر الظهر طلعنا أنا (وبنت خالي 2) نهجول بسياكل (خالد + سعود) عيال خالي (السياكل مسروقه منهم طبعاً)

لفينا ودرنا ووصلنا لأماكن ما كنت متخيله اننا بنوصلها ، ويوم أذن العصر رجعنا وروسنا صاكتنا من الدوران في ذا الشمس
لقينا البزران : اللي مستن ، واللي مرتفعه حرارته ، واللي أكتسب العدوى بسرعة وطلعت له كم حبه من العنقز
والسبب (خالد) البثر ، الشرير ، المعاندي ، خراب السفينة


ما يستـــفاد من سالوفه 3 /p10
إذا كان الطفل ، أو حتى الشخص البالغ عنيد و(بثر) فحاول منعه بأي وسيله ، وان كانت قاسية بعض الشيء ، ففتح المجال أمام عناده سيصيب الآخرين بالفزع ،
وأن يتضرر (واحد) لا أن يتضرر (سبعين)


.
.

+ سالوفه 4 :في كل مره توقف الموية عند الحريم ، وبعد كم سنه من التفكير ، قرروا خوالي حفر خزان أرضي في الحوش الملاصق للبيت الثاني (قسم الحريم)
مره كنا رايحين ، وحفر الخزان توقف لهسبب ، فما كان من خوالي وعيالهم الا انهم تعاونوا في الحفر ، وفعلاً حفروا ، وحفروا ،وانهوا جزء كبير من الشغل قبل وقته ..


ما يستـــفاد من سالوفه 4/p10
فلنتسلح بالتعاون ولنعتني بتلك الشجرة يداً بيد ، وفرداً فرداً ، لنجني أطيب الثمر



*****

هذي هي عيينتنا اللي من نوصل لها والفرحة غامرتنا ، إلى ان نرجع لبيوتنا

يمكن أنا أكن للعيينة معزه غير عن الباقين ، بس تبقى العيينة متنفس جميل ، ومكان رائع لقضاء أوقات ممتعه ..


+ ذكريات أخرى +

* في الشتاء تثمر اشجار الذره (مدري اذا يسمونها اشجار) ، ونتفنن في قطفها واختيار الأكبر حجماً ،
ووش أحلى من شوي الذره في جو بارد ، والتلذذ بسماع فرقعت حباتها

* عيال خوالي مع خوالي بيلعبون كورة في الشارع اللي بين البيتين ، وكانوا بيحددون المرمى ، حددوا المرمى الاول ،
وصاح ولد خالي على ولد خالي الثاني :وين يابو .... الله لو انه استاد الملك فهد
ولد خالي 2 واللي خاف شوي : طيب خلاص بأصغره

استغربت من وصفه للمرمى (الباب) بأنه (حق استاد الملك فهد) ، يوم كبرت شوي عرفت انه يشبهه به عشانه كبير
عليك تشبيه يا ولد خالي .. خلاني أفكر بعمق


.
.
.
.


ترى أكبر كذبه عشناها .. يالله متى نكبر؟!! ..
احلم قد ما تقدر .. واذا خفت .. خبي احلامك بدفتر ..
ترى الايام سراقه .. والاحلام تتبخر ..


[ يومـــنا الحالي ]


ما صرنا ننوم في العيينة الا مره كل ثلاث سنين ..والطلعات ما صارت كل اسبوعين ، يمكن على حسب تصنيفي ،في كل فصل من فصول السنة ..
خال يعزم في الصيف ، وخال في الخريف ، وخال في الشتاء ، وخال في الربيع
نوصل العشا ، ونطلع آخر الليل ، وإذا كانوا مبسوطين جلسوا للفجر
البنات .. كل وحده لابسه لبس جديد ، وكاشخه ، وخوالي يشتكون اللي رايحين للسوق امس ، واللي رايحين له يوم العزيمة العصر !!


.
.

+ سالوفه 1 :
مثل ما ذكرت قبل ان بقسم الحريم فيه مكينه بتشغيلها تنتقل المويه من القليب إلى البركة في قسم الرجال
هالمكينة كان صوتها مزعج لدرجة انه احياناً يقوم النايمين ..
كل صبح كانت العيينة تستيقظ على صوتها ، والبركة تمتلي شوي شوي
وبعدها يسقى الزرع ، واذا كنا هناك سبحنا فيها قبل

قبل سنه ونص تقريباً ، قرروا خوالي انهم يبدلون هالمكينه العتيقه بمكينه جديده بدون صوت مزعج، وتشغيلها ما يحتاج الا لضغطت زر
عكس المكينة القديمة اللي كل ماشفتها احسها من مخلفات الحرب العالمية الثانية
استبدلت المكينه القديمه بالجديدة ، طلباً للراحة والهدوء
لكن وللأسف ، المكينة الجديدة كانت فاشلة ، تطلع شوي من المويه ثم توقف ، ثم تطلع ثم توقف ، بطريقه تطفش ،
وتستهلك اليوم كله عشان تملى البركة ، وكأن موية القليب تجسد الوفاء الذي اغتالته ايدي البشر


مايستـــفاد من سالوفه 1 /p10
قديمك نديمك ، ولا شيء أقبح من قطع عادة ، وإن كانت سيئة أو مزعجة ، فهي تبقى قطعاً من القلب ، لا تنزع منه الا برضاه ، وإلا فالانتقام وارد


.
.

+ سالوفه 2 :
الجوالات صارت بيدين الكل ، والبلوتوث سيد المجالس ..

فلانه 1 : شوفي شوفي ، عندك ذا المقطع
فلانه 2 : لا وريني .... ههههههههه ارسليه لي
فلانه 1 : طيب وهذا عندك
فلانه 2 : اشوف .. ايه عندي مليت منه ، توني ماسحته قبل كم يوم

تنظم اليهم (فلانه 3)
فلانه 3 : عندكم مقاطع بلوتوث جديده
فلانه 1 : ايه عندي
فلانه 3 :قد شفتوا رقص ******
فلانه 1+2 : لا ما شفناه
فلانه 3 : عندي شوفوه ، عليها رقص بنت اللذينا

..... وتستمر المحادثة ، ويستمر تبادل مقاطع البلوتوث
وانا في جهه ثانيه من المجلس
(على قد ما حقدت على جوالي الي بلوتوثه خربان ويرسل فيروسات للعالم ، الا اني كنت مبسوطه لأني خارج ايطار تبادلهم الممل)
أحياناً اخرب عليهم ، وافتح بلوتوثيp9 المريض عشان يخرب عليهم


ما يستـــفاد من سالوفه 2 /p10
لا تجعل من (البلوتوث) هماً لك ، ولا تهمش حديث المجالس ، وما يدور فيه من اخبار وحكايا ، بتبادل اصوات مسجله ،
يقتظي ووصولها لجهاز الآخر بعث جلبة ، وصوت غريب يقطع ما دار من حديث .. (مع احترامي ، بس قمة السطحية والفشل)

.
.

+ سالوفه 3 :
في الشتاء الي راح ، كنا طالعين للعيينه بعد نهاية اختبارات الفصل الأول ، ولأنه إجازه كانت الجلسة صباحيه

بعضهم طلعوا بدري ، وبقى خالي صاحب العزيمة ، وخالي الثاني ، وبنت خالي "أم الحلوين" اللي بتجي تنوم معنا في بيت جدتي ، وطبعاً جدتي وخالاتي

قبل الفجر بشوي قرروا يرجعون ، وبدا التقسيم ..
أمي راحت مع ولد خالي ، وانا كان محكوم علي بالرجعة مع خالي الثاني
سيارة خالي (الجمس) كانت مليانه بزران ، وامهاتهم (بنات خالي) وشغالات ، ووووو
ومعهم بنت خالي "أم الحلوين" وحلوينها ، باختصار " زحمة " .. بس زحمة حلوه
اللي يسوق هو أحمد ولد خالي وأخو "أم الحلوين" من الرضاع
ترجيت أمي اللي راحت قبلي عشان اركب معهم ، وكلمتها بنت خالي تتوسط بس ما نفع
في ذيك اللحظة ، ما تمنيت الا أني أخت أحمد من الرضاع

بعد ما ركبوا جميعهم في جو مشبع بالبهجة التي غطت برد الشتاء ، رحت لسيارة خالي (سيارة ولده) اللي ما كان فيها الا أنا وخالتي وجدتي قدام جنب خالي
وسع ، بس هدوء ، وهجده ، وأكيد ملل
بصراحة ما كان ملل كنت مبسوطة لدرجة اني نسيت (الجمس) واللي فيه ، والوناسة اللي بيحصلونها مع بعض ..
من يوم ما ركبت وأنا وخالي (اللي صار جد) سوالف وبربره ، عن كل شي (تاريخ ، دين ، ارهاب ، اخبار مجتمع ، سوالف الاولين .....) لحد ماوصلنا لبيت جدتي بالرياض
طبعاً ما كان يتكلم الا انا وخالي ، خالتي ساكته وجدتي بعد
حسيت ان موقفي غبي شوي ، واني اقلقت خالي ، بس يوم فكرت ، قلت "لو مل مني بيسلك لي ، والا بيحاول ينهي الحديث ويسكت ويسكتني بس هو كان متحمس معي في السوالف"
يوم دخلنا للبيت سألت خالتي : ليش ساكته
قالت : وش اسوي بكم ، حكيكم حق مثقفين
كبر راسي شوي ، كلامنا كان عادي بس خالتي عليها تصريفه


ما يستـــفاد من سالوفه 3 /p10
إذا وجدت من يتجاوب معك ، فلا تبخل على نفسك وعليه بالحديث ، تحدث حتى تمل أنت أو يمل هو ،
وكن واثقاً من أنك لست بالشخص الثقيل ، لأن الثقيل (الغثيث) لا يرحب به عادةً




*****



هذي بعض سالوفاتي ، ومثل ما تلاحظون سالوفات الطفولة وذكرياتها أجمل وأكثر من سالوفاتنا الحين

.
.

مدري ليه كل ما كبرنا كل ما زاد البعد بدل ما يكون العكس !!
صار فيه مثل الفجوة ، والبعض خذ هالاجتماع وسيلة لاستعراض آخر ما حصل عليه (أكره الاستعراض)

.
.

البــــــزران
أشوف ان طفولتنا كانت أجمل من طفولتهم ، العابنا أكثر ، وحبنا لبعض أعمق (بنات واولاد مع بعض على حد سواء)براءتنا أعذب من براءتهم ..
بوقتنا كانت الروحه للبقالة (كل البزران) أكبر متعه ، الحين أرحمهم ، البقالة ما يروحون لها الا مع شخص كبير (صدق مساكين)

بالمناسبة .. جنب البقالة محل (بيتزا ، فطاير ، شاورما) ودائماً يكون الخيار الامثل لسد الجوع بعد السباحة

[ يا زين طفولتنا رغم الطقاق اللي فيها ] و [ يا زين ذكرياتنا المرسومه على جدران العيينة ]


.
.

+ سالوفات أخرى +

* النخلة الطويلة اللي بين الغرفتين في (قسم الحريم) سمعت ان جدي اللي ما شفته (الله يرحمه) هو اللي زارعها مدري راكزها ،
وبكذا صرت كل ما أشوفها الحين ، أشوف فيها قوة وشموخ وعزة نفس ذاك الشايب اللي ما شفته بس من الكلام عنه حبيته من قلب " عسى اللقا في الجنة يا جدي "


* مره أحوس بجوال خالتي ولقيت من بين الاسماء "رفيق الدرب"
قلت : من رفيق الدرب ؟
قالت : هذا عبد الله ولد ....................
عبدالله هذا هو اللي خالتي دايم ترجع معه من العيينة للرياض ، صار هو وسيارته محجوزين لها من البداية
ومحد يتجرأ يركب معه حتى أهله


* في الحوش اللي هو الحين بمثابة الملعب ، تقام أقوى المباريات
ونسمع أقوى الصرخات ، وأغبى و أطرف التعليقات ، وما نستغرب إذا طبت الكورة علينا فجأه أحلى شي في لعبهم أن أخواني يطلعون مواهبهم ، ويحتكون مع ناس أكبر منهم جسم ، وأكثر خبره (خصوصاً عبدالله) اللي من نرجع يقلد لعبهم
فلان يسجب كذا ، وعبدالله "رفيق الدرب" أحس أنه يقلد زيدان
كذا يسحب ، وكذا ... وكذا ..... يسولف بكل انبهار
ودائماً أسمع تعليق : ( لو محمد ولد خالي يروح للهلال ويحترف احسن له)


* في آخر زيارة لنا كان الروقان سيد الموقف ، البزران في البركة يسبحون ، والحريم جالسين (سوالف وأكل وضحك ووووو)مافيه ضجة بلوتوث كالعادة ، والسبب ان الممولين لهالحالة ما جوا
المكينة الجديدة كل شوي (يا مطفينها يا مشغلينها) ، بس ما طلعت لهم مويه مثل ما بغوا ، ومثل ما كانت تطلع قبل

آخر شي وقبل ما نطلع قاموا البزران يقطفون ليمون من الشجرة ، الليمون توه ما استوى
وانا حاقده عليهم بس ساكته ، لحد ما قضوا على محصول الليمون الخاص بهالسنه كله ( آآآآآآه يالقهر)


.
.
.

كبرنا وكبرت معنا أحلامنا اللي انزرعت بأرض العيينة الطيبة ، وانسقت بموية قليبها ، ورعتها الشمس بكل حنان

.
.


كثير أسمع تعليقات من عيال خوالي (بنات وشباب)
" ملينا من العيينة "
" غيروا "
" خذوا لكم استراحه طيب "
" أنا بأدور لكم استراحه بس أنتم غيروا واطلعوا من ذا العيينة "

.
.

الدروس اللي تعلمتها من المواقف اللي تصير بالعيينة أهم وأعظم من الدروس اللي تعلمها هنا ، بالرياض (أو غيرها من المدن)
لأن العيينة غير ، لها طابع الريف الطيب ، والساذج بدهاء ..
تعلمك بدون ما تقصد ، وبدون ما تتعبك ، تعطيك بدون ما تقول (لا) لو أدى هالشي لنهايتها




.
.
.
.
.
.



أنتم اصدقائي ، أكيد عندكم سالوفات خذتوا منها دروس
أكيد عنكم قرى رسمت أثر في نفوسكم ، وخذت مكان من قلوبكم ..
عرفونا عليها ، وعلى أهم مواقفكم ، وأحداثكم ، وذكرياتكم ...



CC

الله عليكـ يا ريميـــه..

موضوعكـ ممتــع لأبــعد الحـــدود..

وأسلوبك جــــــــذاب كعادتك لدرجـــــة أني أحس اني اسبح معكم بالبركـة

وفعلا أيام أول كانت أجمل لأنهــــــا أبســط ..

:: وانا اشوف أن السعادة بالبساطة كل ما تطور الوقت زاد التصنع والتكلف عند الناس ::

وحتى جمعــة الأقارب ما صار لها طعمـ زي أول ..

مثل ما قلتي يا يجتمعون على بلوتــوث والإرســال يدهر >> ياكرهي له فعلا أنه سخيف<<

ولا تقعد كل وحدة مرتــزة ورافعة خشمــها يقالها مسوية برستيــــج..


ألا يا طفل لا تكبر ..كذا أجمل كذا أطهر ..
كذا لا هم يتراكم .. كذا لا ضغط لا سكر ..

أجمل ذكرياتي هي ذكريات الطفولة رغمـ أن كلها طق ومكافخ بس والله لها طعمـ ذيك الأيامـ

وكبرنا وماجانا إلا الغثا >< كني شايفه ذا الجملة من قبل

وبالنسبة لي والله ما كان لي قرية تركت أثر في نفسي بس منكـ أنتي حبيت العيينة أهمـ شي فيها بركة..

وسالوفاتي وذكراياتي تفشل ما نيب قايلتها

بس ما يستفاد منها : خلوكمـ أقوياء وإذا قرب منكمـ أحد افرشوه بالأرض ><>< تعاني من الإضطهاد في طفولتها

.

.
ريميه نشميه .. قلمكـ من أبرز الأقلامـ في المنتدى

وأسلوبكـ ساحر ..

لا تبخلين علينا بجديدكـ لأننا نستمتع في كتاباتكـ

سلمتي ودمتي

.
.
ريـم Reemالفـلا

عآفآك ربي آختـي ريميه نشميه ع الطرح الرائـع



بصراحه أبصم لك الأن بـ العشرهـ آنـك من أصحأب النفس الطويل ..!



مشاء الله أبداع سوالفك وخصووصاً بأيأم الطفوولـه ..!



عموماً أيأم الطفوولـه لا يعلى عليهآ بـ الذكريات الحلوهـ ..!



وتحس لو تذكرهآ الحين تحس أنهآ حلم وراح ..!



يعني من أول دايم طلعات مـ ع الأهل مثل ماقلتي أستراحآتـ مزارع ..!



تحس بـ نوع من الحمأس وتحس أول الكل ع قلب واحد مهوب الحين ماتشوفهم الا من وقت لـ وقت



يعني من أول من يجي ويكند لازم طلعه عآئليه .. وهـ الطلعه تحمل ذكرياتـ لك مـ ع مرور الأيام



لكن الحين قلت الطلعات والروحات والجيات مهوب مثل أول سآيقينهآ بآي محل



والحين الي بيطلع يطلع بل حاله مهوب مثل أول كل العايله تطلع تحس فيهآ حماس ..!



بس سالفه المكينه ذكرتيني بـ جيرانه عنده مسبح في البيت وحآفر له عين ..!



وكل يوم وهو مشغل المكينه الي تطلع المويه من العين وبصراحه أزعاج غير طبيعي ..!



أذكر أبوي داهمه بيتهم قال شف اذا ماتشيل مكينتك ومسبحك وربي لـ دفن مسبحك ..!



طبعاً هذي قبل 7 سنوات ونا توني ورور هذي بحد ذاتهآ ذكرهـ لأني مت من الضحك



عاد أبو جيرانه شكل على وجهه وعلى نياته وأبوي عصبي والشكليه تموت من الضحك ...!



أذكر أني ورا الباب جالس أتسمع مآوعيت الا أبوي من ورا الباب بصوت عالي خويلد ..!



مآوعيت الا كف أحلاقـه يمشي 70000 ألف من جد جآتني الضربه ونا فيني الضحكه ..!



يعني هذي بحد ذاتهآ ذكرى .. بس من جد لو أرجع سوالفي يبيلي دفتر بو 5000 ويالله ..!



عموماً تشكرات خيتي ع الطرح ..!



أخوك .. خـآلـد


: )

مشكووووووورة على الطرح الـــــــــــرائــــــــــــــــــــــــع

هلا وغلا فيك اختي وفي ايام الطفوله
/

صراحه موضوع وذكريات ولا أروع

حلوه .. نعيش .. الحب .. بقلـوب .. الاطفـال
واحلى .. لو ان .. العمـر .. كلـه .. طفولـه ...

اللـــــــــــــه يامحلى أيام الطفوله لا هم ولاغم ودايم لعب مانفكر بشي أهم شي اللـــــــــــــــــــعب ثم اللـــــــــــــــــــعب ثم اللــــــــــــــــعب...

أيام نتمنى بس لوترجع ونعيشها مـــــــره ثانيه لكن الشكوى للــــــــــــــه
مصير كل طفل بيكبر ويتحسف ويقول :

(الا ليت الطفولــــــــــــه تعود يوماً) < مو الشباب


مشكـــــــــــــــــــوره اختي ويعــــــــطيك العـــــافيه
............

مشكووورة أختي على الكلام الأكثر من رائع..}

ذكرياتي اه منها ذكرياتي ؛؛

الشقاوة كانت اروع صفـــاتي ؛؛

كنت شقية بكايــــــــــــة لحد يقلي شي على طول ابكـــي ؛؛

لما الانسان يعيش عمره كله بنفس الطريقة وتجي اخر سنتين يتغير عليه الوضع
اتوقع ان هذا اقسى شي؛؛

<< فاقدة رتم حياتي اللي اتعودت علية

في حكاية مانساها عمري كلة ؛؛

جدي رحمه الله عليه كل مايشوفني يقلي ابزوجك صالح

صالح = شايب كبير من جيران جدي

وكل ماقال الكلمة هذي انا ازعل واصيح ةاجري اعلم امي ههههههههههه

وكنا نجلس مع جدي بالساعات نلعب باصرة ولا نحل الغاز ؛؛

ياحبي لذيك الايـــــــــــــام اللي كان عنوانها البساطة ؛؛


ريمية نشمية ؛؛ عافاك ربي على جلسة الذكريات الحلوووة

ريميه نشميه0000
اسلوبك في غاية الروعه
طرحك في منتهى الذوق
-------------------------
ألا يا طفل لا تكبر ..كذا أجمل كذا أطهر ..
كذا لا هم يتراكم .. كذا لا ضغط لا سكر ..
(من جد بيتين طالعه من صميم القلب
فعلا مافي احلى من ايام الطفوله لاهم
ولاغم لكن وش نقول عالدنيا تمر بسرعة البرق)
---------------------------------
انا مع ريم الفلا بصراحه
تخيلت اني طامره وسط بركة خوالك
----------------------
ريميه لكي مني كل تقدير واعجاب ياصاحبة الاسلوب الرفيع
--------------------------------------------------
اختكـــــ؛؛\
حالمـــــــــــــــ(deramer)ــــــــــه

ريمـــــيه يعافيك ربي يالحلوووووووووه
\
.
\
.



اااااااااه على الطفوله وأيامها صدق كانت أيام بمعنى الكلمه نضحك ونلعب ونتهاوش بس كانت حلوه المواقف اللي فيها كانت أحلى..
.

شخصياً طفولتي قد تكون مشابهه لطفولتك لأننا أحنا كمان كانت فيه قريه تبعد عن حايل 100 كيلو متر عايش فيها جدي الله يرحمه ببيت وكان حوله 4 بيوت 2 لرجل عمتي واحد ساكنه في عمتي والثاني جارتها اللي مثل عمتي والثالث لعمي اللي بالشرقيه والرابع كان لناس من قرايبنا ومررررره قريبين منا كانت البيوت على شكل مربع مفرغه من الداخل والفراغ اللي داخل كنا نملاه بالضحك أحنا بزران البيوت الاربعه طبعا احنا نسكن عند جدي لما نجي بالأعياد>>>لأن مانجتمع الا في هالفتره أيام كانت حلوه بمعنى الكلمه خصوصا ان عمي كان بالشرقيه وعمتي كانوا بالكويت واحنا وقرايبنا بحااايل بس جدي كان هناك ولما تجي الاعياد نجتمع كلنا شبابنا وبناتنا في موقف ماراح أنساه:

(مره صباح العيد كنا مجتمعين في هالمساحه ولما جت الساعه 10 قلنا يلا نمشي على البقاله القريبه طبعا انا كنت معهم ولما وصلت البقاله شرينا كل شيء ومالذ وطاب من الكاكاو والبيبسي ولما جينا نحاسب فتحت شنطتي الصغيرونه مالقيت فيها فلووووسي رحت وبكل برأءه ورى الثلاجه وأقعد أصيح طبعا الباقين حاسبوا وطلعوا مافقدوووني من كثرنا ماشاء الله ولما رجعوا البيت لقوا فلووووس طايحه بالطريق قالوا هذي لمين ماحد رد خذوها ومشوا >>>أثريها حقتي طبعا مافقدوني الا بعد نص ساعه وانا لازلت في مكاني ودورا علي وجاني ابوووي وطلعني وعطاني فلوسي وقال يلا بحاسب عنك انا كنت طفله قلت لا>>>بكل غباء علبالي ابغى مثلهم احاسب من فلووووسي)
.

طبعا جدي توفى الله يرحمه وأنقطعنا عن ذيك القريه وذيك البيوت والوناسه من 10 او 11 سنه يمكن وماعدنا مثل اول قراب من بعض عمي لما يجي يستأجر شقه وعمتي مثل وأقاربنا ماعادوا يطلعون هناك صارت الوناسه علينا بالمنه وطبعا نقصنا لأن فيه مننا اللي تزوج واللي توظف وراحت أجمل أيام حياتنا..
.
أي والله ياطفل لاتكبر..
.


ريميه تسلمي ياقلبي على هيك مواضيع وربي قلبتي المواجع والذكريات بس يلا دمعت عيوني الشكوى لله..

تقبلي مروري وصداقتي
حــ سعودي ــلاها

ببسيه بنت كولا


وش هاالنور
ما بغينا نشوفك

انتظر عودتك
ولا تسوينها فينا مره ثانيه يام خدود



عذراً للبقيه ، لي عوده مع ردودكم بس رد ببسيه لا يقاوم

ريميـهـ ..

متعتينا بالقصص

أمـآ أيـآم أول

أيـآم ألطفـوله

الي كـل وآحد يتمنى انه يرجع طفـل ..

أللـه يأ أيـآم أول

ودي ارجع طفـل

وآهـتم بألأشـيـآء الي الحين نعتبرها " تآفهه " !!

ريميـهـ

طفولتـك كـآنـت حـآفـلهـ

كـآنت جميـله .. من القصص التي ذكرتيـهـآ

ولكـن

أيـآك وأن تفتحي البلوتوث لكي لاتعادينا

ولكـن طفـوله رآئعه

مسـبح , ملعـب , ونـآسـه , سهـر

أللـه على الطفـوله

ريميـهـ

أتمنى بأن تكثري من مواضيـعـك ..

لأنهـآ ممتعـه

تقبلي مروري

دمت لمن تحبـين : )

BBP