السلام عليكم ورحمة الله وبركاته :

وهاهو أبو مشاري يعود للساحه بعد غياب دام أكثر من شهور .. طبعاً غيرنا سياسة المواضيع .. قديم أحط لكم رؤوس أقلام وأعلق علاها في نص سطر أما هالحين تغير الوضع بجيب لكم موضوع وأصقعه خمطعش سطر > حشى صك بيت مهب موضوع .. وبعدين ترا إذا مارديتوا علي زعلت علاكم ومعد أكتب هنا وبروح لمدونتي أجلس فيها ابربر مع نفسي ( ما صديقي إلا انا ) !


-



أنا شخص إذا حطيت قدامي قهوه وفنجال أجلس اشرب وانا مدري عن نفسي .. أمس شربت الدله كلها وانا مدري , وآنا اقول وش فيني اليوم ماني مظبوط آثراني قاحفن الدله كلها وآعزتيلي والله :(
آمس سهران ومضيَع واليوم مأجر عقلي .. المهم واحد من الربع الله يهديه فاقعن راسي بمشاريعه كل ماجلست سولفت معه قال وش رايك نفتح محل مخبز ولا نفتح دكان نترزق الله من وراه .. خف علانا يالوليد بن طلال . هذا والله اللي مقطوع سره في محل عقارات .. أنا عارف إنه قول بلا فعل بس يسولف لكن الظاهر بسحب علاه واسويلي بسطة مساويك بعد كل صلاه كود اطلع قريشات بدال سواليفه اللي لاتودي ولا تجيب .. له سنتين وهو يفتح مشاريع براسه لكن ماش فعل ولا آخر شي جايني يقول وش رايك آفتح سوق غنم .. لا هذا الظاهر ناويها شر , ناوي يضيع فلوسه .. آجل تفتح لك سوق غنم لا وبعد مهب فالمدينه يعني كل يوم داق 100 كيلو رايح و 100 جاي



المهم اتركوكم من هذا ومشاريعه الدايخه .. الحين فيه برنامج بالجوال فاقعن تسبدي وآتوقع بتصير حرب أهليه ببيتنا لو ما حجبوه ألا وهو الواتساب .. الواتساب وما آدراك مالواتساب , كل يوم وفيه مطاق بقروب العايله والمشكله آخذين الموضوع بجد , ناهيك عن سوالف الحريم بالخاص والحش اللي يصير كميه حش غير طبيعيه .. اللي يحشون فيها أمها داعيتن لها وش ذا الحسنات اللي تجيها ماشاء الله !
بس فايدته الوحيده هي تقرب لك البعيد وتبعَد لك القريب .. يعني البعيد تتواصل معه والقريب تلعن خامسه علشان ينقلع عنك , مخ ياحبيبي مخ > تف تف علي ماشاء الله ياحبنيلي بس
وأشين شي فيه إذا ارسلك واحد برودكاست تقول صك بيت وش ذا يبوي قسم بالله لو إني مقطع الفضاوه ماقريته لا والمشكه أول البرودكاست أذكار و وسطه خبر خادمه إثيوبيه تاكل بزر و آخره نتايج الدوري الإنقليزي
وقمة المشكله والمنذله ( خاصية آخر ظهور ) .. المفروض قبل قبل تدخل الواتساب يطلع لك : هل انت متأكد ان ماعندك مصرفه ؟ قسم بالله مهب حاله كل مادخلت البرنامج نط لي واحد وقال جابك الله ليه ماترد على إتصالي قبل شوي , يبن الحلال والله مدري وش اقولك !
بس أكبر تناقض : إننا كلنا نكره الواتساب وكلنا محملينه .. أصلاً ماتقدر تحذفه لإنك إن حذفته وماشاركت بقروب العايله طلعوك من كرت العايله !





مر من هنا فتى العريجاء ( أبو مشاري )

ههههههههههههههه دوخه

ع العموم اعتقد في برنامج تقدر
تغير فيه اخر ظهور ...

يعطيك العافيه ...

هههههههههههههههه
مـآ أقول ألآ سود الله وجهه اللي أخترع الواتس و الظهور
و الله يـآ هو مسوي لنـآ مشاكل لا يعلم بها الا الله
ودي أحذفه بس أخـآف يحذفوني من كرت العايلة
مر من هوون كل يووم ولا تقاطعنا

خخخخ بجد شيء بعتقد فيه برنامج للتغير فيك تدرسه جيدآ..

ههههههههههههههههههههههه
اما هذا خويك ابو مشاريع وبقاله ياكثرهم مثله ،، الشباب ذبحتهم البطاله الله يكون بالعون
وعن برنامج الواتس بالعكس انا اشوف انه برنامج حلو خصوصا لا صرت طفشان تطقطق على اللي بالقروب
طبعا الاالمشرف عليه عشان مايسوي لك خروج بلا عوده
ومثل ماقلت يقرب البعيد ويبعد القريب وهذا عيب فيه وبنفس الوقت ميزه
وكمان من مساوئه اجتماعيا ساهم بنشر كثير من الشائعات.. والا البرودكاستات اللي مدري وش هي مثل اللي يقول أنشر تؤجر فيه اشياء صح تستحق النشر وفيه اشياء لا
مثلاً اللي يرسل 10 رسايل يجيه رزق بعد شهرين ،، سلامات ..
هالرسايل على طول احذفها والا اطنشها ..كثير من العلماء حذروا منها ..
وأما خاصية الظهور بالنسبه لي ماتشكل مشكله > جوالي وبكيفي أدخل واطلع متى ماابي

سوالفك خفيفه وظريفه وتوسع الصدر الله يوسع عليك
ننتظر مواضيع اخرى ... ومر دوم هنيا ..والله يعطيك العافية ..

هﻵ و غﻵ حيآاك ربي نورت

الواتس أب « مممم بصراحه إنت تگلمت عن مشگلة كلنا نعاني منها
من خلال الواتس آب المستحيل يصير حقيقة « يعني ممگن جمل نايم بحضن نملة عادي عادي
يرسلون لك برود گاست طويل و فاضي وبالأخير مگتوب يسگني الهدووء « سكنك جني إستغفر الله
بس تراه حلو بشي واحد أحس دخولنا بقروب واحد جمع آلشمل
أما خاصية : آخر ظهور .. ما أقول غير روح جعلك تنشب بزوجة ماتريحك أبدا

يعطيگک العآافيهہ ( أبو مشاري ) صراحة ضحگتنا روح ي شيخ ربي يسعدك

ههههه سردْ ولا أرِوعْ الظَاهرْ
مَنْ شِربْ القَهوهْ ..
شُكراً لكْ خَيوْ أبوْمشَاريّ ..