يالله حييهم .. سلام عليكم

كان ودي أقفل سلسلة مواضع " خثاريدز أبو مشاري " لكن فيه أحد الأعضاء طلب مني أكملها .. رخيص والطلب غالي أقصد غالي والطلب رخيص >> بغيت أجيب العيد

-

في أمريكا يبلغ متوسط سرعة استجابة الشرطة 5 دقائق، بالسعودية الحرامي ان طب عليك البيت راح يعطيك جواله ويقولك خذ اتصل على 999 يمكن يردون .. ويجلس عند الباب ينتظرك يقولك : هاه ردوا ولا للحين !!
ماتدري وش تقوله .. ثم يقولك : إن ردوا علمني .. ويصقع الباب ويمشي

..

" وراء كل أسطورة ب كرة قدم بيت كسر لمباته وهو صغير "
زمان كنت العب كوره فالحوش ويجي لفريقي بلنتي وأنا أصايح براسي كله: أنا بشوت أنا بشوووووت .. المهم شت الكوره وهي تصقع باللمبه وتنكسر وجدي يطلع : من اللي كسر اللمبه .. وأنا أعدي وأدخل البيت وتجيك مطارده بيني وبين جدي نفس اللي في توم وجيري .. وأنا أعدي التفت ورا بشوف جدي للحين يلحقني ولا , لا .. وأنا أصقع بالجدار وهو يمسكني ويعطيني ويعطيني ويعطيني لين ماتفلت العافيه .. ثم قلتله : تراها " لمبه " ب 20 ريال
قالي : ما دامها بعشرين ريال أدفعها يالسلوقي .. المهم بعد السالفه هذي قررت الإعتزال الدولي وكرموني بين الشوطين والهديه كانت ( نعال تمشي 220 حتى أستقرت في منتصف الجبهه ) !!

..

قلت لواحد من الجماعه : أقطعلي من الكيك .. قالي : كيك ولا تويتر
عاد رميت الصحن على جبهته وقلت له : لا بوك ولابو اللي يجلس معك يا سامج .. إلى يومك هذا وهو يتصل علي وده يعزمني على عشاء بس أنا ماسكن أعصابي ولا ودي أفرم وجهه هالسامج

..

مره دقيت على واحد من الجماعه مسافر برا إبتعاث .. وسمعت عنده صوت إزعاج من التلفزيون قلت له قصر صوت التلفزيون بقولك شي .. قال : صديق سكر صوت التلفزيون .. الله يقلع الإبتعاث اللي أنت عارفه

..

قديم كنت جالس مع أولاد عمي في المجلس وكل دقيقه نسمع لنا أصوات غريبه .. سكتنا مره مرتين ثلاثه بس زاد الوضع عن حده وصار ليلنا كله دوران ندور الصوت .. آخر شي طلع صوت " فار " !!!

..

ياخي جوالات هالوقت صايرين " مدلعين " لازم تقصر الصوت وتقصر الإضاءه عشان مايخلص الشحن
الله يرحم أيام " النوكيا " يجلس أسبوعين وهو ماخلص لدرجة إن ودك تقوله : ياخي أنت ماتطفي

..

ياخي الطلاب حقين الإختبارات يصيرون نفسيات أيام الإختبارات .. تدخل عليه الغرفه تلقاه يصايح عليك ويقول وش تبغى خيير أخلص علي .. تقول قاتلن له أحد ؟؟ ودك تطقطق عليه تفتح باب الغرفه وتصكرها ثم تفتحها وتصكرها وتقوله ذاكر ياوليدي ذاكر أحب أطقطق على الناس .. لكن إذا طقطقت علي بطق راسك بالجدار >> نفسيه

..

العيد الرسمي للطلاب : يوم السبت الجاي الساعه 7 صبح
" ومن العايدين .. ومن الراسبين " إنشاء الله هههههههههههههههههههههههه >> أمزح أمزح الله يوفقكم

..

الناس تمشي بالعكس .. أمس جاني واحد وقالي تبغى عشاء قلت له لا .. وجاب لي عشاء
واليوم أقوله أبغى عشاء .. وهو يسحب علي طيب ليه كذا

..

" الكامري " هي السيارة الأكثر إنتشاراً في الشوارع السعوديه .. ومع ذلك يكرهها الشعب السعودي قمة التناقض

..

الحين " النص ريال " وينه مختفي ؟؟
اشتريت حمضيات يوم جيت أحاسب قال لي المحاسب : أشتر لك شي بنص ريال
قلت : ليه
قال : ماعندنا نص ريال ؟؟

..

أنتهت خثاريدزي الماصله والمارجه .. على الأمل اللقاء بكم في مواضيع قادمه


اللي عنده سؤال أو يبغى توقيعي يتفضل هُنا https://twitter.com/abo_msharry