البارحه .. والحلم ملّ مـن السهـر=ومن هو يطيق الإنتظـار ولحظتـه
تكالبت ضـدي معاريـض الدهـر=من كل صوب محاوطتنـي قبضتـه
هوّنتها .. وآعوذ مـن زود القهـر=اللي بيدين القـرم زلـزل نفضتـه
وماعقب آهات الكتوم إذا ظهـر ..=صوت الونين اللي يجـاوب نبضتـه
يسيل من عينه علـى خـده نهـر=يرعد ونينـه والظليمـه ومضتـه
يقول بكرى .. وبكرى عدّا من شهر=مدري متى الميعـاد يعلـن يقظتـه
والله لاسوق الـروح لعناقـه مهـر=والشعر ماسهل عندنا مـن قرضتـه
بس أهتني بالحلم من بعـد السهـر=الله يجـازي فـي طويلـه لحظتـه

يامداي المنطوي .. جد بساعة مشرقي=خلني أنشر شعاعي على الصم .. البكم
وياصدى صوتي وش يردك لسمع الشقي=وياأبانات الحمر هد شوقي حيلكم
ماهقيت إنك بتفهم محبة خافقي=أو تحد أشواقي اللي تسيّرني لكم
شيءٍ أغرب من خيالك ولاهو منطقي=يكفي إن قلت البلاوي سبايب حبكم
من قبل يولد هذاك اللي تشوفه "لقي"=والوكاد .. إلين يفنى صغاير جيلكم ..
ماني بقادر على وصف عارض بارقي=لين يغرقني .. أو إنه رواني سيلكم
لك طرقت القاف .. ليتك سواتي تطرقي=أو ترى ذا اللي كتب جاك طارق بابكم

بحت الخفا .. ساعة بدأ نوح ورقي=مع سابق إصراري ولاهو صواديف
ضاقت وأنا كنت أحسب الهم طرقي=وأثره طلع راعي محل .. آه .. ياحيف
كريم طبع .. ومسرف بنار حرقي=وأنا أشهد إنه قايم بواجب الضيف
يرعد إلى من لاح له نوض برقي=وياليت بارق عارضي بأول الصيف
ماكنت أحايل دمعتي "هاك وإرقي"=وماكانت العبره بحلقي على جريف
بلاي لامن ذعذع النود شرقي=والوقت ماهو للهواوي على الكيف
وأمطرت دمعي وإنحدر سيل عرقي=وأرويت في صدري غروس المواليف
ماطبت من دكتور .. ولاشيخ يرقي=طب الهوى من غيرها زيف في زيف

إسمعي ياضيقة صدور العباد=ضيقي أكثر .. ماوراك إلا الفرج
ماسكه في رأسي اليابس عناد=ومغتني عن كل دعوى للحرج
وناوي أشعل بالفرح ليل الحداد=ومايهم اللي ورى ظهري هرج
ومن رفع سبع السما دون العماد=عارجٍ بالمصطفى .. وبلا درج
الظنون .. وطبّها عين الوكاد=والعداله من ورى هالمنعرج
ماتهيّت .. غير بإصرار وجهاد=منهج الناجي ولو مشيه عرج
ومن خرج لابد وإنه يوم عاد=ومن يعود إفطن له شوي وخرج
وإسمعي ياضيقة صدور العباد=ضيقي أكثر .. ماوراك إلا الفرج

ياضيقتي والهـم والحـزن بالـدور=وكلن بيأخذ من جروحي نصيبـه
صفّوا على شباك الأنفاس طابـور=وإنتزعوا آهات الجـروح العطيبـه
ويامرحباً بالظلم والغبـن والجـور=ضيّفكم الخافق مواجيـب طيبـه
وسحايب عيوني سطع نوضها نـور=وأطفت ظماكم بالدموع السكيبـه
البارحه والليل حالـك وديجـور=ليله من الشهـر المبـارك غريبـه
شهر رمضان اللي برى كل مسحور=ولو هو تخلا عـن زيـارة طبيبـه
متصفد الشيطان فيهـا ومدحـور="وحي الكتاب" وما بالكتاب ريبه
آمنت بالقرآن ناصـح ودستـور=وكفرت بالثالـوث ويّـا صليبـه
والليله اللي لخبطت بعض الأمـور=عندي لها حـل العقـول النجيبـه
صحيح يمسي خاطري فيك مكسور=وصحيح لحظاتك بطئيه .. كئيبـه
وصحيح فاقد فيك ياقوتة الحـور=أقرب بعيده .. مدري أبعد قريبـه
"نجمة سهيل" اللي لها موعد ظهور=وإذا ظهرت قلت: أرحبي يالحبيبـه
وصحيح من ظلماك بالحيل مقهور=لابان في رأسي مـن الهـم شيبـه
لكن دمعي فيك مخفـي ومستـور=عن من يقول إن دمعة الرجل عيبه
اللي يحط إذنه على صامت السـور=يبغـى الشماتـه لاتوحـى نحيبـه
ينطح سواليف القفى نطحة الثـور=والله يعين اللـي قرونـه تصيبـه
مافي قوامسيه من الخلـق معـذور=كسّاب ذنب ويجني الذنب خيبـه
من طبعه إنه يشهد الكذب والزور=ويخوض بأعراض المخاليـق غيبـه
والعبد بإذن الله على الجرح مأجور=مادام يرضـى لاتلقـى المصيبـه
ويقول: سلوان الحزن شيء مقدور=وحكم القدر راضي بما لـي يجيبـه
وصلاة ربي عدّ قطـرات البحـور=على النبي وآلـه ومـن صحيبـه