السلام عليكم ورحمة الله وبركاته
صبحكم الله بالخير
طبعًا يومي الرمضاني
11 \ 9 , للأسف صادف عزيمة
نسائية
ومفهوم العزيمة النسائية عندي :
# كرف وبلا طعام
يعني من جد , تقوم الصباح وتنكرف وتشتري أغراض
!
بالنهاية يبلعونها الحريم , وماتلقى شيء
<
يعني المفروض من أبسط حقوقي أنا , كَ
" أبو صروال وفنيلة " !
أنا أبلع قليلًا من الذي اشتريته
المهم , كل شيء صار معي بحطه هنا إن شاء الله
ويَ رب يعجبكم يوممي
بدايةً , أنا كل يوم أول ما أقوم , أقرأ قرآن
و إن شاء الله أختم
طبعًا أنا داري إن اليوم كرف , فأحاول أرضي الوالدة بأي طريقة
عشان تخفف الطلبات شوي , ترانا صايمين
المهم , أول ماخلصت من قراءة القرآن , يعطوني ذيك الورقة
المليانة أغراض , لعيون الحريم اللي بيجون
وانا أمري إلى الله , شغلت السيارة وهوبا إلى السدحان
وصورت لكم
بعض المقاضي
هالشوربة , أحبها حبّا شديدًا , طبعا هذي مو للعزيمة , لنا يعني
أساسية بالبيت
كرتون مياه نوفا , كأن المعازيم اللي بيجون عطشانين
أقول لأمي يشربون من البرادة تقول لااا
<
وش رايكم
المهم , أنا
صايم وحرر وتعب يعني أكيد أثر على وجهي وصرت
عبد
لكن المشكلة , إن أخوي الصغير لزم علي يروح , وقعد يصيح إلى ما جاء أبوي
وقال خذه معاك غصبن عنك , أقول لأبوي حر , يقول لا خله يستانس
<
أي وناسة بهالحر
طبعًا يوم أخوي إنكرف , وحس بغلطه وإنه بس يبي
يعاندني
حرم يروح معي للسوق مرةٍ ثانية
شوفوا شكله شلون من الحر
طبعًا هذي الصورة
بنهاية رحلتنا , داخل دنكن دوناتس
ويوم شفته شوي ويصيح من التعب , قلت خلني أشتري له كتكات لبى قلبه
وأنا بشري لي ليز عشان أمز مز عليه
بعد العشاء
وبعدها خلصنا التسويق
ورجعنا للبيت , وكنت
تعباااان ححيل !
نزلنا الأغراض من السيارة , ورحت نمت أنا وأخوي
أنا قمت قبل المغرب
, بس هو دق أوم أومها نومه إلى الساعة
9
فطورنا كان خفيف شوي ,
لان بيجونا حريم بعد التراويح
هذي صورة من فطورنا :
وبعد الفطور مباشرةً , فتحت التلفزيون أبشوف سككتم بكتم
لكن توه ماجاء , لقيت صلاة المغرب من الحرم
المهم , ما أمداني أسترخي , إلا وقالوا لي رح المحامص جب مكسرات
وبعدما رحت المحامص , صليت العشاء ورجعت , ما أمداني أصلي
التراويح
من التعب
عيونني مبققةُ !
دخلت المنتدى على طول أبي ألحق على
فعالية خمنها صح !
ماودي يزعلون علي آل المجلس
وبعدها , رحت أساعدهُم في تجهيز البيت للمعازيم
وهذي
كواليس من العمل :
وامسسح , عاد أنا ماعرف أمسح , يعني امشيها وبس
مدري صح ولا لا
<
هاه ؟
وبعد هذا كله , للأسف إني
أمرت بغسيل الحوش
وأمسك اللَّي , وأرش , إلين ماصار الحوش يبرق
والحمدلله ماجاء غبار وراح تعبي هدر
الصورة اللي فوق لاحظوا فيها وصاخة حوشنا , وتونا مغسلينه قريب
الله يعيننا على جو الرياض
المهم , ماعلينا , تبون تشوفون اللي شريته وش صار فيه
سموا , هذا كل شيء شريته ,
بس للمعازيم
هذي شريتها , سعرها غالي شوي ,
لأنها شغل يدوي !
المهم صارت بيني وبين العامل اللي يشتغل هناك مشكلة بسببها
تهاوشت أنا وياه على
السعر , إلى مانقص 20 ريال
<~
أكثر كلمة رددتها يوم أشتري هالغرض " اللهم إني صائم "
طبعًا هذا أكل الحريم , يَ للأسف !
ودي أقول للوالدة
" وأنا " , بس ماقدر
إن شاء الله بكرة أنا أجيب لنفسي
وما أعطيهم
طبعًا هذي الصحون كانت كثيرة وعليها عرض !
قبل ما أخذها , صورتها , وقلت لأمي تراها رخيصة وزينة !
مجرد ماقرب كلمة
رخيصة , قالت جبها
<
توقع لا أكثر
وبعدها , رحت
مطعم الرومانسي , أجيب سحور قبل الزحمة !
جبته تقريبًا الساعة 11 وربع , رجليّة
وبعدها جيت للمنتدى على طوُل !
للي مايعرف المطعم , هذا هو
:
* طبعًا للأمانه الصورة قديمة , بس من تصويري وطرحتها للتوضيح
+ هذا أخوي الحبيب , بعد ماقام من النوم تقول جني
فرحان , لأن بيجي خويه وبيلعبون بلاي ستيشن
وبكذا أنتهى يومي , باقي يومي ما كان مهم كثيير
يعني تسحرت وأشياء روتينيه فقط !
أتمنى اعجبكم يومي , وحاز على رضاكم , ويَ رب إني قدمت كل اللي علي
يوم أعتبره مرح وبسيط و
متعبً جدًا , لكن حنا في رمضان
وبإذن الواحد الأحد الأجر مضاعف
تصبحون على ألف خير