بسم الله الرحمن الرحيم
اركدي عن حالة الطيش واسلي بالغرام
وارفقي في قلب مغليك من بعض الامور
خلي المركب يعدي على خير وسلام
لايضيع بعالي الموج في وسط البحور
ماتحمل طعنة الوقت من كف الملام
ولاأبيت لضيم الايام لاصارت دبور
احترم من يستحقون كل الاحترام
ولاتسرع في ظنوني ولااطيق الغرور
كان فكري مايرده حدود ولانظام
وش خطايه لو يقولون ماهو بمعذور
ياحبيبي من عيوني تبي تقرا كلام
يخبرك عما بصدري وماوسطه يدور
يختصر لك مبدأ الحب عندي والهيام
ويتضح لك مطلبي منك واسباب السرور
كان ودك يمضي الوقت بأحسن مايرام
لاتصير لسد الاحباب في هرجك جسور
للمحبه عند الاحباب غايات ومرام
تتضح بآمال واشواق واحساس وشعور
والغلا بقلوب الاحباب له قدر ومقام
والتواصل له مكانه وله قيمه ودور
واللقى يرفع معزتك عن كل الانام
والجفا يرخص محبتك لو كنت معسور
يمكن الشرهه توصل حدود الانتقام
واتهوي بك من خفوقي الى سور القبور
كان ماعندك معزه ولافيك اهتمام
ينتهي مشوار الاحباب والعشره تبور
والحقيقه في عيوني غدى حبك حطام
وابتديت انسى مع الوقت ياعطر الزهور
لاانت باول من عشقته ولا مسك الختام
دام فيني رغبة الشوق لازالت تفور
والله اني لرضي القلب لوزاد الملام
واتهنا في زماني على مر العصور
دامني ماسقت الاقدام بدروب الحرام
بأذن ربي يصبح الذنب للنفس امغفور
اخوكم : فهد الظفيري