شبكة القناص - الموقع الرسمي للاعب ياسر القحطاني

مالمت نفسي كثر مالمتها اليوم = عليك يا ظالم عسى الله يجازيك
جيت اشتكي لك لكن اسرفت باللوم = واسرفت في كبرك وزايد تباهيك
لكن تذكرني ليا شدوا القوم = وحالوا عن ديارك وعن قفر اراضيك
تذكر اني جيت مضهود مظلوم = اشكي الهضيمة والفرج كان بيديك
جيتك ولكن عدت مكسور مضيوم = خيبت بامالي وهي راكنة فيك
ردك عميق؛؛ولا انت بالرد ملزوم؛؛ = احترت كيف افهمك واحترت اجاريك
لا تحسب ان قدري مع الناس مهظوم = لا والله الا حافظه قبل لا اجيك
من لاح لي برقك معه رعد وغيوم = ركضت صوبه قلت له عز واليك
واثر البروق اللي تراوى لي حلوم = لا فيه لا بارق ولا ذي ولا ذيك
جاش الفواد وصار بالوجد مقسوم = وده يعلمك بخطاك ويناجيك
؛؛أخترت عنك البعد؛؛ والأمر محسوم = وما اقول غير الله عن الظلم يهديك
لا والله الا عنك باعف واشوم = ماعاد لك فيني ولا عاد لي فيك
البارحة؛؛جتني النسانيس بعلوم = عنك ولكن مافتحت الشبابيك
ما احب اهد الحيل واهبط عزوم = واجرحك وانا حاير كيف اراضيك
يا ورد؛؛ ياعناب؛؛ ياتوت؛؛ ياكروم؛؛ = يا ما النهر؛؛ ياعذب الاسماع طاريك؛؛
ياسبحة الناموس؛؛يادر منظوم؛؛ = يا ( صقر ) ؛؛ ماتشبك عليه الشبابيك
ياشعري اللي ماخذل خاطري دوم = لبيه ؛؛ يوم اكتبك واسبك معانيك
تطمر غزير البحر غواص وتعوم = وتعود لي بالغانمة يوم اناديك
لبيه؛؛ يوم ادفعك ما اعرضك للسوم = وغيري يساوم فيك ويجير الشيك
ياشعر ؛؛ انا لا رحت مارحت مهزوم = لا والله الا حشمة عند مغليك
واما انت يا ظالم؛؛ معزز ومحشوم = بذكرك بغرورك وليلة تجافيك
وانته تذكرني ليا شدوا القوم = وحالوا عن ديارك وعن قفر اراضيك
تذكر اني جيت ؛؛محتار ؛؛ مظلوم = وساقتني الدنيا تحت رحمة ايديك
رسمتني في صورة الناس برسوم = شوهتني؛؛ سامحك ربك وباريك
من عهد يعقوب النبي؛؛ الذيب متهوم = واخوان يوسف لفقوه الشرابيك
ياكسر قلبي كسرة زجاج مهشوم = مماحصل ياقلب ناهيك ؛؛ ناهيك
ناهيك لا تملا التباريح بهموم = جنب طريق الشعر والله بيغنيك
ياقلب منت بمن هل الطيب محروم = مثل الذهب ماكل سوام شاريك
حتى ولو فاقت على سعرك طقوم = يبقى عيارك نادر عند قانيك
بينك وبين اهل الوفا عقد مبروم = ان تملك بطيبك شعوب ومماليك
إن شفت عمد البيت طايح ومهدوم = قل ياعمود البيت؛؛ يرفعك بانيك
لا تاخذك في قومته حق وسلوم = الناس ابد ماتعذرك ماتراعيك
كثرتها ؛؛ وابياتها لمعة نجوم = في ( كمها وبكيفها ) جت دواليك
وختامها؛؛ يا الله لك نحج ونصوم = إغفر لنا من قبل نبعث وناتيك
وصلاة ربي ع النبي سائر اليوم = يا الله تشفعنا به ادعيك وارجيك