<HR style="COLOR: #bdbdbd; BACKGROUND-COLOR: #bdbdbd" SIZE=1>

بسم الله الرحمن الرحيم
السلام عليكم,,

أنا قاعد قد ما أقدر أحاول أهدي نفسي وما أزودها في الكلام خصوصا إنو هذا راح يكون أول موضوع ليّا في الموقع الرسمي للهلال وما أحوب أخربها قدام ناس ما أعرفهم بعدين يقولوا سراج عمر طلع متهور وماينفع يصير عمدة حي السبيل.
لكن بصراحة اللي بيصير في الكورة السعودية شي يضايق الواحد ويجيب له الغم ولاينفع معاه لا براد شاهي منعنش ولا كاسة كركديه والا سوبيا , ماعاد شي يتخبى و لاصار شي مكسوت عنه مسألة إنو فيه استقصاد واضح على فريق الهلال بالذات من بين كل الأندية السعودية وكأنه الهلال صاير الحيطة القصيرة بين الأندية, ولاعاد شي يتخبى ولامسكوت عنه إنو فيه أندية غلطها على قلوب الاتحاد السعودي زي العسل, وكلامهم وحشهم في القيادات الرياضية ماينقال عنه إلا (ضرب الحبيب زي أكل الزبيب), وكمان ماعاد شي يتخبى ولامسكوت عنه من إنو اللي يصرخ ويتبكبك ويعمل فيها (الفتوّة التلفونية) هو اللي بياكل الجو وهو اللي بيقولوا له (طلباتك أوامر ياسيدي) ولو إنو الشي هدا كان باين من زمان بس رئيسنا الله يوفقه مو راضي يقتنع فيه ومصمم يتعامل مع الناس بأخلاقه رغم سوء تعاملهم بأخلاقهم وهذا مع كل التقدير لرئيسنا وحبيبنا أبوفيصل مو منطقي لأنك يابوفيصل في غابة,, ما أقول إنو إذا ما أكلتهم أكلوك ولو إنو هذا جزء مهم من اللعبة بس برضه القضية محتاجة سياسة وعلى قولة العسكريين كرّ وفرّ ,,, يعني مرة يابو فيصل تكون عبدالرحمن بن مساعد الطيب أبو نية صافية ومرة تلبس لبس نورمان شوارتزكوف القائد العسكري وتضرب وتدمر كل اللي قدامك بـ البي 52,, ومرة تصير زي حبيبنا الله يرحمه (لطفي زيني) وتعطيهم تمثيلية تاخذ بيها منهم كل اللي تبغى أو مو كل اللي تبغى, تاخد منهم اللقمة الكبيرة وتترك لك الفتاتيت وبرضه كتير عليهم
يعني لمن أجي أنا أتابع مباراة زي مباراة الإتحاد والفيصلي (وآآآآه على إتحاد زمان, أيام القملة ودانا دانا والكتلوج وعيال راجخان وكعدور النجدة وبعدهم عبدالله غراب وسراج فريج وجمال فرحان وبندر الهندوس وعمر الأعرج وهاني كتّوري وعبدالله الفوّال وأبوميمون وعلى لعب المزمار في النادي بعدما يفوزوا على الوحدة) و أشوف أسامة المولد وعبدالملك زيايه يجلدوا في خلق الله فأنا ألوم لجان المجاملات على قصر يدها (طبعا ما ألوم الهلالي عادل البطي , لأنو أصلا اللي زيه ماينشره عليه والشرهة بس عالهلاليين اللي حيبقى يضحك في وجيههم بعد اللي صار واللي يقولوا هذي كورة ماتدخل في العلاقات الشخصية) ووقتها يكبر في عيني رئيس الهلال إنو ماطلع في الإعلام وتدخل في شي مايخصه,
ولكن لمن يتعاقب لاعب هلالي على لقطة وموقف مشابه للي صار للإتحاديين فأنا هنا ألوم رئيس الهلال وإدارة الهلال ليه مامارستوا ضغوطكم من بدري بهدوء وقلتوا لهم بعيد عن الجرايد (إحنا شايفين وساكتين بمزاجنا,, لكن لاتنسوها لنا)
وألوم إعلام الهلال إنو ماسوى صجة وقروش أبو اللجان وخلا الناس كلها مالها سيرة الا ليه اللعيبة ماتوقفوا؟؟ لكن نهايتها سبعة مقالاات في أسبوع واحد وتتقفل القضية ويادار مادخلك شر أو زي مابيقولوا جيراننا في مكة (مين يشوفك ياللي بتغمز في الظلما)

الوضع محتاج تنظيم وتكتكة, محتاج تنازلات ومناورات لأنو الطيب مأكول حقه, وزي مايقولوا حبايبنا البدو (الحقوق يبغى لها حلوق)
تصريح رئيسنا أبو فيصل أمس حلو وقوي وهدا شي مطلوب من فترة لفترة وخصوصا في زي هدي المواقف, ولكنه بعد خراب مالطا وبعدما طاح الفاس في الراس,, والحين وقت الشغل المنظم والمرتب ,, كيف تفكر وتكسب كل الناس في صفك بدال مو كل الناس أعداءك, على الأقل يصير طرف واحد يحبنا بالغلط
وهذا الموضوع يبغى له وقفة منفصلة عشان نتكلم عن أهمية التحالفات وتأثيراتها على القرارات , والأهم دحّين في الأيام الجاية برضه هو نقل القضية من ملعب الرياضة لملعب السياسة والقرار هذا ماحيلغيه ولاحيوقفه إلا اللي أكبر من لجنة مدري لجنتين نواف ,, وهذا الشي لازم يعمله الهلاليين عشان لابكرة يجي قرار جديد من لجنة المسابقات والا لجنة المنتخبات يوقف رادوي مباراتين زيادة



أنا جاتني كم رسالة من بعض الأعضاء في الموقع عن مواضيعي السابقة, يتكلموا عن لهجتي وإنهم مو قادرين يفهموها ,, فأنا حاولت اليوم أكون قريب منكم وأتكلم اللهجة البيضا قد ما أقدر على الأقل في الكتابة وأكتر من كذا معليش ما أقدر, والعذر منكم كلكم

مشكور والله يعطيك الف عافيه ع الطرح المميز

لاهنت طرح جميييل ومميز..

الله يعافيك ع الطرح المميز والجميل
لاهنت ,,,