- ماكفاك ! حتى في حلمي معنيني معك .. ( ما وراء النفس ) ! .. - شبكة القناص

**I b r a a** · 03-02-2011, 10:58 PM

.

اول شيء وقبل ما ابدأ .. ترا العنوان ماله علاقه بالموضوع
بس اني بلشت الله يجزاني خير بالعنوان ومير امحط لكم ذا

أحيان كثيرة تمر علينا ظواهر غريبه مانملك لها تفسير علمي
ولا حتى نعرف كيف صارت ؟ ، تثير فضولنا وتثير بداخلنا تساؤلات كثيره مالها آخر ..
موضوعي يتكلم عن هالظواهر وطريقة حدوثها ..
فكرة الموضوع جتني قبل كم يوم بعد ماتعرضت لموقف محرج بسبب احد هالظواهر
خلكم من المقدمات وخلونا ننبرش في صلب الموضوع

ــــــــــ I b r a a ــــــــــ

[ .. Déjà vu .. ]

" عشت نفس الموقف في وقت سابق .. بس كيف تكرّر علي ؟ "

في أحيان كثيرة يتعرض الشخص لمواقف يحس انها مرّت عليه قبل كذا .. ويذكر الموقف بكامل تفاصيله " الاشخاص ، الاماكن ، ردّات الفعل ، . . . "
وتخليه يتساءل هل هو في حلم أو حقيقه ؟! واذا كان حقيقة كيف عاش نفس الأحداث قبل ؟!
هذي الظاهرة تُسمى " Déjà vu " كلمة فرنسية تعني " شُوهد مُسبقاً " .
وهي أكثر الظواهر اللي تصيب الشخص ب لحسة مخ غير طبيعيه .. وتطقّه الفهاوه وقتها
يبقى السؤال المهم :

- وش تفسير هالظاهره ، وكيف تحدث ؟!

اختلفت التفسيرات حول هالظاهره .. ف فيه من فسّرها علمياً ، وفيه من فسّرها نفسياً ، وفيه من فسّرها بأنها علم من علوم ما وراء النفس ..
خلون اعطيكم التفسيرات حبه حبه ، واللي يجوز لكم خذوه

- التفسير العلمي :

يقولون العلماء أن مخ الانسان يحتوي على عدة مناطق ، وكل منطقة مخصصه لعمل معيّن " الرؤيه لها منطقة خاصة ، والسمع له منقطه خاصة ، وهكذا .. "
الشيء الطبيعي اللي يحدث في مخ الانسان اذا شاف موقف قدامه .. ان الصورة تذهب لثلاث مناطق بالترتيب :
1 / منطقة الرؤية .
2 / منطقة الإدارك .
3 / الذاكرة .
الحاصل في الظاهره هذي انه يصير فيه تضارب بالترتيب في مخ الانسان ، ف يصير الترتيب على الشكل التالي :
1 / منطقة الرؤية .
2 / الذاكرة .
3 / منطقة الإدراك .
ف يعتقد الانسان انه شاف الحدث مُسبقاً .. بينما هو أول مره يعيشه واللي حصل انه خزّن الحدث قبل يدركه .

- التحليل النفسي :

خبراء علم النفس فسرّو هالظاهرة على انها رغبه قويه في الشخص على تكرار تجربة ماضيه .
( عن نفسي مافهمت شيء .. انتم فهمتو ؟ )

- علماء الباراسيكولوجي ( أو علماء ما وراء النفس ) :

يالبي قلوبهم بس
ذولا احس انهم يطرقعون من هالكيسان ويجون يطقطقون علينا
بس خيالهم خصب وبطل

علماء ما وراء النفس
يفسرون هالظاهره على انها ناتجه من خبره ورؤية للحياة عشناها قبل مانطلع على الدنيا .

عموماً ..
مادام ان الشيء بالشيء يُذكر ، توجد ظاهره معاكسه " للديجا فو " وتُسمى Jamais Vu
الظاهره هذي تجعل الشخص يحس بأن المألوف ، غريب !
مثل بأنه يجلس قدام شخص يعرفه زين اخوه او صديقه او غيره .. ويجيه بلحظه شعور بأن اللي قدامه غريب ولا يعرفه
شخصياً .. ماقد مرّيت فيها ، لكن اذا فيه احد مر بهالظاهره يقول لنا وش السالفة

ــــــــــ I b r a a ــــــــــ

[ .. الأحـلام .. ]

" وش يعني الحلم ؟ "
" وهل للحلم علاقه بالواقع ؟ "

اسئله جميله تنم عن ذكاء وفطنة السائل
<-- ياشين اللي مالقى احد يرفّع به .. يبدأ يرفع بنفسه
ماعلينا ..

أغلب العلماء يعتقدون بأن الحلم ماهو الا انعكاس لرغباتنا اللي تكون في حياتنا الواعيه
ف الشخص اذا كانت عنده رغبه في حياته بأنه يعمل شيء ما او يقابل شخص آخر ، وسيطر هالشيء على تفكيره ..
دايركت راح يحصل له هالشيء بالحلم ..

احد العلماء سوا تجارب على اشخاص نايمين ، ولاحظ ان الموجات الدماغيه أثناء النوم تكون هادئه
وفجأه ترتفع سرعة الموجات الدماغيه ، ويصبح دماغ الانسان وكأنه مستيقظ بالرغم من انه بسابع نومه
هذي المرحله واللي يكون فيها الدماغ في قمة نشاطه اثناء النوم تسمى مرحلة الـ REM وهي اللي تتم فيها الاحلام .
بحيث جسم الانسان في هالمرحله يكون في قمة استرخائه ويكون مشلول تقريباً باستثناء " العين " اللي تبدأ تتحرك بسرعه وعشوائية .
وسبب عدم تفاعل الانسان مع الأحداث اللي تجري أثناء الحلم هو وجود منطقه في الدماغ مسوؤله عن شل حركة الجسم اثناء الحلم ..
و احيانا تكون هالمنطقه فيها خلل ف يبدأ يتفاعل الجسم مع الحلم
( الله يذكر واحد من العيال بالخير يطلع من غرفته يتمشى وهو نايم )

ومادمنا نتكلم عن مرحلة الـ REM ..
فيه مرحله اخرى يمر فيها الانسان اثناء نومه وهي مرحلة Non REM واللي كانو يعتقدون العلماء سابقاً انها مرحله مايتم فيها اي حلم ..
لكن بعد وقت ظهرت الدراسات الحديثه واثبتت انهم على خطأ وان مرحلة Non REM يتم فيها احلام ..

يبقى السؤال الآن :
وش الفرق بين مرحلة ال REM و Non REM ؟

احد العلماء سوا تجربه على شخص نايم وقرّر يصحيه في المرحلتين
في مرحلة الـ REM اكتشف ان الشخص يصحى ونفسيته زفت !!
وفي مرحلة Non REM اكتشف ان الشخص يصحى ونفسيته حلوه ومبتسم للحياة
ف اكتشف من خلال هالتجربه ان مرحلة ال REM تكون فيها المشاعر السلبيه مثل القلق والخوف نشطه
بينما المشاعر السلبيه في المرحلة الاخرى غير نشطه ..
وهذا مايفسّر عن روقان بعض الناس اول مايقومون ، واللي يصحى ونفسه بخشمه .

طيب السؤال المهم الآن :
شلون اخلي اهلي يدرون بأي مرحله انا عشان يعرفون متى يصحونن ؟
هالسؤال جاوبو عليه انتم مب بتله انا اسأل واجاوب

فيه شيء ابي اتكلم عنه بعيد عن هدف الموضوع
لكني اول ماقريته حسيت اني متحطم ، وحبيت تشاركوني هذا الشعور الرائع
الا وهو :

- أحلام غيّرت التاريخ !

1 / الجدول الدوري للعناصر الكيميائية جاءت للعالم الروسي " ديمترى مندليف " في احد احلامه .
2 / كاتبة رواية فرانكنشتين " مارى شيلي " .. اخذت احداث الرواية من احد احلامها .
3 / " الياس هاو " كان عاكف على اختراع اول ماكينه للخياطه ( حلوه عاكف ذي ) ، وباحد احلامه شاف مجموعه من الاشخاص يهاجمونه ومعهم رماح ..
ومباشره قام من النوم .. وبعد ماجلس يتذكر تفاصيل الحلم تذكّر ان مقدمة روؤس الرماح اللي هوجم فيها كانت تحتوي على فتحه
ومن هنا اكتشف ان ابرة الخياطه لابد ان تحتوي على فتحه

( اييييه انا ابكي على حالي هذولا يحلمون باختراعات وانا احلامي كلها نجحت باختبار ، سقطت باختبار ، فاز الهلال ولا خسر .. واقصى حلم وصلت له اني اقابل مزّه )
بس ماقلتو لي .. كيف الشعور ؟

ــــــــــ I b r a a ــــــــــ

[ .. التخاطـر .. ]

في كثير من الاوقات نتعرض لمواقف نبدأ نحس ان فيه اشخاص يشاركوننا نفس التفكير
ونبدأ نتسائل هل اللي يصير له سبب أم مجرد صدفة ؟!
كأن مثلاً تفكّر في احد الاشخاص القديمين .. وفجأه تلقاه يدق على جوالك
كيف عرف انك تفكر به ؟
اللي صار باختصار هو عملية تواصل بين افكارك وافكاره ومشاعرك ومشاعره .. وهذي الظاهره تسمى " تخاطر " ..
احياناً الظاهره هذي تُكتسب بالتعلّم والتدريب .. لكنها في الاساس موهبه من الله سبحانه وتعالى ..
فيه مجتمعات مثل قبائل الأبوريجينز " سكان استراليا الأصليين " يعتبرون التخاطر موهبه تنتشر بينهم دون استغرب ( تسيف ماصرت منهم ) ..

التخاطر عند الاشخاص مثله مثل تقنية البلوتوث ، ف البلوتوث تقدر من خلاله ترسل ملفات من جهاز للثاني عن طريق الموجات ..
وطبعاً تختلف انواع الاجهزه .. فيه اجهزه ضعيفه بالارسال او بالاستقبال ، وفيه اجهزه سريعه .. وهكذا . . .
نفس الشيء يحصل للانسان بعملية التخاطر ..
فيه بعض الناس مثل جوال الكاشف مابوه بلوتوث ابد
وفيه بعضهم زي البلاك بيري بلوتوثه مخيس وبطيء ويرفع الضغط ( فيس يعاني من بلوتوثه )

وطبعاً علماء ما وراء النفس وضعو ظروف كثيره تساعد على عملية التخاطر ..
مثل ان يكون بين الشخصين محبه ، ويُقال بأن المحبون هم أكثر الناس قدره على التخاطر
( طيب واللي مايصير له تخاطر الا مع اللي يكرههم .. وش يسوي ؟ )
ومن الظروف ايضاً ان تكون الليله قمريه ( لاحد يسالن وراه لاني حتى انا مادري )
بالاضافة الى اعتدال الطقس ( عاد تراها مصخت .. يعني قالو قمريه سلكنا لهم بس عاد جازت لهم السالفه اشوف )
وفيه ظروف ثانيه مقنعه مب زي اللي فوق
مثل صفاء الذهن وهدوء الاعصاب

هذي تقريباً ظاهرة التخاطر باختصار شديد .. واتمنى انه وصلت لكم ولو نص معلومه
وانصحكم بتجربة احد التمارين يمكن احد منكم تطلع عنده الموهبه من حيث لا يعلم ( بغيت اجيب لكم تمرين بس حسيت اني نفسيه ومير اهوّن )

ــــــــــ I b r a a ــــــــــ

- السؤال المطروح للنقاش الآن :
وش رايكم بالخلفيه ؟

لكم المايك

على فكرة ..
الموضوع اهداء لـ حبيب الألب ابويزيد
واهدي له من على هذا المنبر .. اغنية الطقاقه
يا واحشنا وش اخبارك ؟
علينا ليش ماتسأل ؟
تبينا نوصل لدارك ؟
خلاص ابشر ولا تزعل