السلام عليكم ورحمة الله وبركاته

صباح / مساء الخير

ألف مبروك لجميع الهلاليين الفوز بالكأس الغالية وهاردلك لجميع الأهلاويين ( مثلي ) والله يعوضهم غير

مقدمــــــــــة :

انتهت المباراة وانتهى كل شي وصارت عملية تسليم الميداليات الفضية للأهلاويين والذهبية والكأس للهلاليين.

طلعت من الملعب وأنا مو كويس وأخلاقي تجارية بس الحمد لله ما لقيت احد اتهاوش معاه .

طلعت السيارة وهي حقت خويي وهو من الجمهور الهلالي وطبعًا هنيته بالكأس وكان الموضع ماشي

طلعنا من مواقف الإستاد وكل شي كان على ما يرام والحمد لله .

السالفــــــــــة :

معروف من انه عقب كل نهائي تكون مسيرة للبطل وكنا ماشين فيه لكن .......

تعطل الخط فجأة فاضطررنا للانتظار حتى حركة المرور تتعدل ولكن ......

جانا ورع عمره 13 سنة تقريبًا وصار معاه الحوار التالي:

الورع : تراهم قدام بيكسرون السيارة .

خويي وأنا : خير ويش السالفة على ايش بيكسرونها ؟؟؟

الورع : بس كذا هم كسروا سيارات قبل وهم الحين جايينكم .

في أثناء الحوار كان جنبنا سيارة وصاحبها يتكلم جوال جاه واحد واخذ الجوال من اذنه وهرب .

قام الورع ودخل راسه بالسيارة ويقول ابغى اتشخص قمنا وطردناه من السيارة .

تسهلت الحركة قليـــــًلا ثم توقفت والوضع صاير شوربة واحنا ما ندري .

جانا ورع ثاني عمره 12 سنة تقريبًا وضرب على الباب واحنا مسكرين القزاز

قمنا وفتحنا الباب وقال لنا جيبوا الجوالات والا كسرت القزاز

دورنا عجرة . مسدس . مرسام . قلم . حديدة . ما لقينا ولا شي وطردناه

قام ونادى ناس وخلال ثواني إذا بنا نلاقي جيش يقدر بـــ جيش الأورك في ملك الخواتم ( أقصد 30 على الأقل )

ويش الحل ما لقينا غير إننا ننحاش ( نحط رجلينا ) ودعسنا ومع النحشة إذا بحجر عيار 5 بوصة في منتصف قزاز السائق وصار ولاشي .

المهم بالبواري والزعاق طلعنا من المنطقة المحتلة .

لقينا دورية وصار الحوار التالي :

إحنا : يا طويل العمر الوضع داخل شوربة وفيه ناس تسرق وتكسر سيارات.

العسكري : ندري واحنا بنروح بعد شوي !!!

قلنا : طيب لو ترسلون دورية وحده تفكك منهم.

العسكري : خلاص بنروح لهم <<<<<<< حسيت إنها على وزن اسكتوا.

ما صدقنا أننا طلعنا من الملعب وزحمته ووصلنا لبر الأمام وبرزت أمامنا مشكلة..

كيف نوصل للشرقية والقزاز مكسور ؟؟؟

رحنا لبنشر وطلبنا منه كرتون علشان نقفل القزاز قال ما عندي وبالقوة طلعنا كرتون. جينا نلفه ماهي راضية تجي معانا قال لنا روحوا لمغسلة ملابس في الشارع وخذوا منهم اكياس ملابس ولصقوها بالباب ومشوا عمركم .

رحنا لراعي المغسلة وحدث التالي .

احنا : صديق جيب كيس حق ملابس علشان ابغى حط على باب حق سيارة .

الصديق : ما فيه كيس .

احنا : نعطيك 10 ريال بس جيب كيس .

الصديق ما قصر وأعطانا 3 أكياس حقت ثياب وقعدنا نلفها على السيارة وما أعطيناه فلوس.

جانا الصديق وقال : مين كسر هازا ؟

احنا : نفر بزورة ما ادري ايش يبقى .

مالكم بطوالها والله الصديق طلع نشمي ولزق لنا الاكيس وشدها بكراتين وتوكلنا على الله

طلعنا من الرياض الساعة 1 تقريبًا بدلا من الساعة 11:30 على الاقل.

وصلنا الشرقية والحمد لله وصلنا والاكياس وصلتنا ولكن ........

خويي جاه قزاز في رأسه وجروح في رقبته ويده وجيبه تعبأ من القزاز وقلنا نروح المستشفى نشيك عليه .

دخلنا المستشفى واعطيناهم رقم الملف وقال تفضلوا بالطواري وصارت المشكلة التالية :

الطبيب : ممكن تحكون لي ويش صار ؟؟

احنا : حكينا له اللي صار بالتفصيل .

الطبيب : وبعدين ويش صار <<<<<<< حسينا اننا حقيرين وبقوة وزاعقنا على الدكتور.

شاف الجروح وطلع من عندنا وما ندري وين راح .

ما فيه دقيقة إلا موظف الاستقبال إلا موظف الاستقبال عندنا ويقول ترى الدكتور جاني ويبغى يبلغ الشرطة.

روقنا الدكتور وضمدوا جروح خويي وبدل ما نطلع رحنا لغرفة الدكتور وصار التالي :

احنا : ويش السالفة ويش دخل الشرطة في الموضوع ؟

الدكتور : بس حبيت اني اتطمن عليكم .

احنا : ما شاء الله هذا كله حرص مين المفروض انه يبلغ الشرطة ؟؟؟

الدكتور سكت واعطانا روشته العلاج ( طبعًا تقطعت قدامه ) وقال راجعوا عيادة العظام .

طلعنا من المستشفى وفكينا البلاستيك ووصلنا السكن والحمد لله على كل حال .

الخاتمــــــــــة :

س1/ من المسؤول عن الانفلات الامني امام الملعب ؟؟؟

س2/ ما هو رد العسكري لو كان رئيسه او شخص مهم مكاننا ؟؟؟

س3/ ما هو الحل للتخلص من هؤلاء ( المشاغبين ) ؟؟؟

س4/ لو اننا استخدمنا القوة وضربنا واحد منهم انا اتوقع اننا راح نعتبر غلطانين. هل انت معي ؟طيب ويش الحل؟؟


يوم الأربعاء مباراة الأهلي أمام الاتحاد ان شاء الله . اذا فاز الأهلي وواجهنا الهلال كان تفكيري اني اجي الملعب لكن الحين ما فيه امل اني احضر أي ملعب حتى لو ملعب الحارة ..

على فكرة هالمشاغبين لابسين شعار الهلال بس أنا ما اعتبرتهم هلاليين . لأنكم انتم اعطيتوا الصورة الحقيقة يا أعضاء المنتدى وليس هم .

وتقبلوا خالص تحياتي والمعذرة على التطويل/

علاء الجحدلي