شبكة القناص - الموقع الرسمي للاعب ياسر القحطاني - لا تجرحيني جرحك العام ما طاب .. كلاكيت تاسع مره ..!!

كل سنة ومع بداية البطوله الآسيويه .. يدخل هلالنا وهو المرشح رقم 1 لإقتناص البطوله .. ولكن إرادة رب الجلاله تمنع حصولنا عليها .. تكرر الخروج سنه بعد سنه لنصل للخروج للمره التاسعه على التوالي .. لكن هل يعني هذا نهاية العالم .. هل يعني هذا أن ننسف تاريخ الهلال الحاضر قبل الماضي ..!!

مع كل ماحدث من تهاون واستهتار ليلة العشرين من اكتوبر من اللاعبين لا يعني أن ننسف الافراح واليالي الملاح الي عشناها معهم .. نعم زعلونا وضيقوا صدورنا .. نعم خذلوا 70 ألف متفرج ملوا درّة الملاعب .. ويستاهلون نسفل فيهم ليل نهار .. لكن هذا مايعني إننا نسحب عليهم ونخليهم لحالهم باقي الموسم .. زي الخطأ الي ارتكبه رئيس النادي بعد نهاية المباراه مباشره ..!!

مشكلتنا الوحيده مع الاسيويه هي تهويلها من قبل أي رئيس يجي للهلال بشكل يسبب ضغط للجمهور أولاً قبل اللاعبين .. وتعليق جميع النجاحات على تحقيق البطوله الآسيويه .. وعشان كذا نشوف إختراعات غريبه عجيبه يطلعون لنا بها الرؤوساء قبل أي مباراه مفصليه بهالبطوله .. أما معسكر ماله أي سنع لمدة كم يوم بدوله خليجيه .. أو حشر اللاعبين لمدة 14 يوم بدون ما يواجهون الجمهور الا بيوم واحد ولمدة ساعتين فقط لاغير .. أو مشاكل مع اتحادات اللاعبين الاجانب وتصاريح ناريه بينهم .. كل هالعوامل وغيرها تسبب ضغط لنا قبل اللاعبين وكلنا يمكن شفنا كذا شخص يقول خلاص بطلت تشجيع بعد ماطلع من الاسيويه ..!!

برضوا الجهاز الفني هالسنه وقع بخطأ غريب .. كيف تخلي الفريق لمدة 14 يوم متواصله بدون مايلعب مباراه .. شلون راح تطبق خطتك والتكتيك الي راح تدخل فيه المباراه .. هل راح تطبق الخطه بتقسيمه بين اللاعبين ..!! طيب اللاعبين كلهم حاضرين معك وعارفين الخطه والتكتيك يعني ماراح ينجح التطبيق .. كان المفروض على الأقل نلعب مباراتين وديه .. ادري بيجي واحد يقول الفريق يعاني من اصابات .. ياخي طيب اللاعب المصاب لا يلعب كلنا شفنا اعتماد جيريتس البارح على رادوي – الفريدي – الشلهوب – عيسى .. هالرباعي الحمدلله كله كان متواجد ولا يعاني من أي اصابات .. خط الدفاع كامل مافيه أي اصابه .. يعني علشان لاعبين مصابين ما اللعب وديات ..!!

زبدة كلامي .. الاعداد بالمرات التسع الي طلع فيها الفريق من الاسيويه كل مره يكون غلط .. وللاسف يجي الموسم القادم ولا نستفيد من تجارب الموسم الماضي .. تنعاد نفس الاغلاط قبل مباريات الاسيويه .. لكن إن شاء الله طال الزمن أو قصر راح نجيب الآسيويه من جديد .. وراح يتذوق طعمها كل واحد ماذاق طعم البطولات الاسيويه مع الهلال – وهم كثار - ..

نجي لنقطه مهمه ثانيه .. تصرف الرئيس وإعلان الاستقاله .. يا حضرة الريس إنت تقول إنك تقديراً للجمهور الهلالي أعلنت إستقالتك .. مدري من الي قايل لك – طال عمرك – إنك بهالقرار تقدّر الجمهور .. بهالقرار يابو فيصل تعاقب الجمهور عقاب أشنع من خروج الفريق من الاسيويه .. قرارك هذا تبعاته وسلبياته أكثر بكثير من إيجابياته .. بكل بساطه ياطويل العمر .. تبي تقدّر الجمهور الي حضر وفلل الملعب عن بكرة أبيه .. اطلع وصرح إن اللاعبين مخصوم عليهم 50% من رواتبهم لمدة شهرين + حرمان من مكافئات الفوز إلى نهاية الموسم .. فعل مبدأ الثواب والعقاب ..زي ما ياخذون رواتب ومكافئات ضخمه بحال الفوز .. لازم يكون فيه عقوبات قويه بحال الخساره .. هالتصرف يابو فيصل هو الي راح يرضي الجمهور .. أما تبي تسحب على الفريق والموسم توه ببدايته وتقول تقديراً للجمهور .. وتخلي النادي يترنح ببداية الموسم .. هذا مهوب تقدير هذا قهر على قهر .. بنهاية الموسم شفت نفسك خلاص عطيت كل الي عندك ولا تقدر تقدم أكثر للكيان .. الله معك وبيض الله وجهك ماقصرت يابو فيصل ..

نروح لنقطه ثالثه مهمه .. كأني اشوف ناس تردد اسحبوا على الفريق ولا تحضرون المباراه الجايه .. خير يابوي وش الي اسحب على الفريق .. الحضور لدعم الهلال بكل مباراه ماهو متعلق بخروج من بطوله .. ولا هو متعلق بتسجيل موقف .. فيه ألف طريقه تقدر تعبّر فيها عن غضبك .. لكن تقولي لا أحد يحضر بالملعب لا والف لا .. بغض النظر المباراه الجايه من معه .. لازم الجمهور – خاصه جمهور الرياض – يحضر للملعب ويدعم الهلال .. لا تعطون أحد فرصه إنه يستنقص من الهلال بسبب ترك جماهيره له .. حنا الرقم الصعب بالمملكه وحنا الي ملينا الملاعب وهزيناها .. يخذلوننا اللاعبين بالملعب لكن الجمهور بالمدرج يرفع الراس .. قلبه على الهلال بالحلوه والمره .. هزيمة مباراة وخروج من بطوله ماتهز شعره براس أصغر مشجع هلالي وتخليه يفكر للحظه يتخلى عن الهلال .. طلعنا من بطوله خلاص انتهى الموضوع التفكير دايركت يتحول للبطوله الي بعدها .. الدوري وولي العهد والملك وفيصل كلها نبيها .. ونبي ندعم الهلال فيها بكل قوتنا .. وان شاء الله راجعين للاسيويه وراح تستمر محاولة الهلال انه يرجع ويحققها للمره الثالثه .. فـ لا اشوف أحد يقول لا تحضرون واسحبوا عليهم ابي اشوف الملعب يوم الأحد زي ماتعودنا .. جمهور هلالي يثبت إنه الأكبر والأكثر في المملكه .. جمهور هلالي يثبت إنه مع فريقه بالحلوه والمره .. جمهور هلالي يثبت عشقه الأبدي للهلال ..

الخروج من الاسيويه ليس نهاية المطاف .. كلها أقل من ثلاث شهور ونرجع من جديد نلعب بهالبطوله .. ونرجع بنفس القوه والطموح لدعم الهلال لتحقيقها .. لكن إن شاء الله بعد أن يستفيد الجميع من الدروس السابقه .. وبإذن الله راح تكون المحاوله العاشرة صائبه ..

وعلى درب البطولات الهلاليه نلتقي ..