السلام عليكم ورحمة الله ..
يالله حيّ حقين المجلس ..
منوّرين بوجودي
من فترة ماهي قريبة .. لاحظت شي غريب .. وكل يوم أقول اليوم لازم أكتب موضوع بالمجلس ونتناقش فيه بس العرق السوداني أوقاته دايم غلط ..
جتني رسالة خاصه لأحد الأعضاء طلب مني أناقشه بموضوع خاص فيه .. وناقشته .. ولما انتهيت منه .. طرى على بالي هالموضوع .. قلت لازم أنزله الحين ..
أول شي لازم أوصل لكم الشي اللي لاحظته ..
بذكر لكم مثال وإن شاء الله يوصل /
قبل فترة سألت بنت معي بالماسنجر وكانت علاقتي معها كويسة وبنفس الوقت علاقتي مع ( خويها ) ممتازة جدا ً ,, كان سؤالي / ( إنتي تكلمين شباب غيري ع المسن ؟؟ )
ردت ( ليييييه وش شايفني ؟؟ )
وبعد فترة جاني ( خويّها ) وقال لي تهاوشت مع فلانة وانتهى كل شي بيننا .. قلت ليه وش صار ؟
قال اكتشفت إنها تكلم غيري ع الجوال ,,
إنصدمت انا .. قلت له ليه هي تكلمك ع الجوال ؟
قال ايه , وليتها وقفت ع الجوال بس .. ارسلت لي صورها ..
السؤال اللي أبي أوصل له /
- ليه البنت لما تكلم شباب ع المسن ,, تنكر هالشي ؟
- ليه البنت لما ترسل صورها لأحد الشباب .. تطلب منه إنه ما يرسلها ! ؟
لهالدرجة واثقه فيه !!
إذا كان الجواب ( إيه ) .. فـ إني أبشر البنت بوصولها لقمة الغباء
معليش , بس هالسؤال محيّرني , وودي ألقى له جواب ..
.. .. .. ..
وقبل كم يوم .. جاني أحد الأعضاء وصارت بيني وبينه محادثة خلاصتها هي /
هو : نواف ..
أنا : سمـّ ..
هو : أقبل ..
أنا : وش ذا ؟
هو : ملف مضغوط .. فك الضغط عنه وشوف الصور ..
أنا : صور ؟؟ ,, وش صوره يا ركبه ؟
هو : وحده بالموقع .. .
أنا : من الموقع ..؟ ,, منهي ؟
هو : ما تعرفها .. نكها مو معروف بالمنتدى ..
أنا : طيب , ليه سويت كذا ؟
هو : أرسلت لها صوري , ووعدتني إنها ماتعطيها أحد .. وبعد فترة لقيتها بأحد المنتديات كـ صورة رمزية مدري صور للمسن .. والحين جالس آخذ حقي ..
أنا : طيب وش دراك إنها هي اللي سوّت كذا ؟
هو : أنا ما أعطيت صوري لأي أحد غيرها ..
.. إنتهت المحادثة ..
بصراحة الرجال ماينلام .. لإنها وعدته بشي وما التزمت بوعدها .. هي سوّت شي , لازم تتحمل ردة الفعل ..
.. .. .. ..
قبل فترة ..
جتني وحده من البنات ع المسن ..
وقالت لي إحلق يا نواف .. جهازي فيه واحد مخترقه ..
قلت .. جهازك فيه صور لك أو لأهلك ؟
قالت : إيه , أصلا ً أنا أعرف اللي اخترق جهازي .. هو طلب مني صوري وماعطيته ..
قلت : طيب وش دراك إنه هو اللي اخترق جهازك ؟
قالت : ارسل لي صوري على إيميلي !!
.. إنتهت المحادثة ..
وأنا في بالي إستفهام كبير كبر راس تميم .. .. <- القلب لتميم مو للإستفهام
الحين ليه البنات يحطون صورهم في الجهاز ؟
لهالدرجة معجبه بخشتك !!
لهالدرجة واثقه إن جهازك ماراح يُخترق ؟
فيه بعض بنات مسويات فيها بقمة الذكاء .. تجي تقول .. انا انزل صوري ع الجهاز وبعدين احذفهم ..
أحب أبشرهن إنه فيه أكثر من طريقة لإسترجاع الصور .. حتى لو يتفرمت الجهاز ..
والله ماني جالس أخوفكن .. لكن قسم بالله شي يقهر ..
’’‘‘
بنت تحط صورها بالجهاز .. وتروح تسوي مشاكل مع شباب .. أو تحتك فيهم .. وتبي ما يصير لها شي ..
يمكن يكون الشاب , غبي , همجي , متخلف .. بس هالشي مايعني إني أكلم عيال وأوثق فيهم ..
’’‘‘
وبنت ترسل صورها لخويّها .. وهي عارفه إنه لاراح يتزوجها ولا شي .. خصوصا ً إذا كان من مدينة ثانية .. وإذا تركوا بعض تبيه ما يرسل صورها ..
قمة الغباء صرااااحة ..
.. .. .. ..
أتمنى الموضوع مايخرج عن نطاق النقاش ..
وأتمنى الموضوع ما ينقلب شات ..
فوائد × فوائد :
1- لاتحط صورك بالجهاز حتى لو لمدة 5 دقايق .. إذا تبي تحطها حطها بـ( فلاش ميموري ) .. يعني لاتخزنها ع الجهاز ..
2 - إذا عندك كام بالجهاز حط عليها أي شي بحيث إنه حتى لو إشتغلت راح يطلع شي أسود ..
كل الود ..
نزف ’’