أنا طلعت بهل دنيا وكل اجدادي وجداتي موجودين بس الواحد مايحس
.................................... بقيمتهم ألا اذا فقدهم
تشوفوني اي احد بدت عليه علامات الشيخوخه , أحب اشوفه واتأمل بوجه
........................................ سبحـــــــان خلاقهــــــــم

ولا اذا طاحت دمعه من عينهم , ودي أسئلهم ليش , بس أخاف احرق قلوبهم ..

( نورة ) _ الله يرحمها _

توفت في رمضان اللي راح هيي اللي كانت ماليه علينا البيت
بضحتكها , بسواليفها , بعصبيتها , بسؤاله عن صغير وكبير
كانت قايمه تصلي , وأخذ الله أمانته , كل ماشفت السجاده والشرشف تذكرتها

احس لحد اللحين ريحة الحنا اللي بشعرها فيه
احس لحد اللحين ريحة ثيابها فيه
احس لحد اللحين ريحة دهن العود فيه منها

و كانت دايم تسألني إلى وين طال شعري ! ..

جدّتي ..

كلما بعثرتُ جدائلي ..

تفوح رائحة يديكِ ..

فيغمرني شوق طفولي للبكاء في حضنك ..

الله يرحمك ويغفر لك
الله يرحمك ويغفر لك
الله يجعل مثواك الجنه
الله يجمعني فيك في جنات النعيم
اللهم آمين

جدي ( سلامه ) _ رحمه الله عليه _

توفي قبل جدتي بسنـــتين .. كان طيب وكنت أحب اقعد معه
وأحب سواليفه . وكان مثال للي بالصبر , والقوة , والشجاعه
ماكان يخاف ألا من ربه ,

أتذكر موقف ل/ جدي ( الله يرحمه )....
.......(مخاوي الذيـــــب )......
كان عند جدي خرفان فهو يوديها عند شخص يراعها له
وهو راجع على حمار ( الله يعزكم ) كان فيه ذيب يلاحق جدي
اذا جلس جدي جلس الذيب , جدي جلس وشب الضو وحمس قهوته
وسوى قرصه , وكان رابط الحمار , الحمار من الخوف قام يتحرك
فجدي كب قهوته وشال أغراضه وها ذيب معاه
لين عاد ما أقبل على ديرته والذيب بعدها راح ..

الله يرحمك ويغفر لك
الله يرحمك ويغفر لك
الله يجعل مثواك الجنه
الله يجمعني فيك في جنات النعيم
اللهم آمين

جدتي (مليحة ) _ الله يطول بعمرها _

جدتي تحبنا كثير كثير وتنبسط لما يجي ابوي وأخوانه، قلبها معنا كلنا
هي قدوتي بالصبره ياااااااه قديش عانت وصبرت , لماكنت تجيي تسولف عن أيام قبل
كانت تعاني ونعرف حنا حياة قبل كلها شقى والفرح فيها يمشي مثل عقارب الساعة
والسنه اللي راحت اعتمرت معنا , سبحان الله يسر الله لنا كل شي ..

أتذكر موقف ل/ جدتي ( طول الله بعمرها )...
مرة جاها كسر في فخذها وجلست في المستشفى فتره
جاني شي من الخوف ! قمت ادعي وادعي وادعي يارب ماتحرمنا منها
وشوي شوي تحسنت حالتها _ الحمدلله _ رحمتها عانت كثيييييييييييير

وكل فترة اكتشف من معاناتها شي جديد
بس ان شاء الله مايضيع اجرها ,اجرها عند ربي ،

الله يجزها خير الجزاء

جدي احبه بكل حالاته , طيب , وحنوون , وقلبه أبيض يحب الناس
يحترمونه قدوه للصبر , حبيت أشي كثيره منه وغير فيني اشياء كثيره
أستانس على سواليفه , احس براحه ما احسه مع أحد غيره

الله يطول بعمرك
الله لايحرمنا منك
اللهم آمين

عمت أمي اعتبرها جدتي احبها احبها احبها ، لحد بكرا احبها
لدرجه اني من قلب من وانا صغيرة كنت اتمنى انها جدتي ، ولحد اللحين !
فتشوفون اول مانروح للرياض لازم نزورها

احب سواليفها واحب ريحتها واحب اخدمها من عيوني

وبعد هالكلام,
في شيي يحزي بخاطري واكييد بخاطر الجدات
انتم يالاحفاد من جد انقهر منكم !
يعنيي نعمة كبيره يكون عندك , جده أو , جد , كيف لو كانوا كلهم
استغلوا كل لحظه معاهم , لايجي يوم وتندمون عليه
فضلتوا عرس وإلا عزيمة وإلا صديق على الجلسة مع اجدادكم

لما اروح لمكان يصير فيه جدات وحفيدات ، يصير وجهي كذا :|
عادي عندهم ، الجده تروح وتجيب وتشيل وهم جالسين :|
اصلا اصلا من الاحترام مايصلح احد اكبر منك يخدمك !
كيف لو كانت جدتك أو جدك !

اخدموهم بكل طاقتكم ، وبرهم من بر الوالدين
لا تخلونهم يندمون انكم احفادهم
اقل شي كلموهم ، واسألوا عنهم وشوفوا اخبارهم

هي جالسه في مكان مرتفع تقريباً في اعلى جبل وتسولف وتنشد عني
فجيت أصب لها القهواه قلتلها أنزلي أقهويك
قالتلي لا انتي تعالي وتبتسم , فأنا ماصدقت ورحتلها وضميتها وقاعد اصييح
وهي تصيح معاي ... كنا كلنا فرحانيين
وقمت من الحلم وعيوني تدمع
بعدين قعدت أدعي لها

وجلست افكر بالحلم ، وانبسطت كثييير
ضميتها بالدنيا ، وما احلى ضمتها !

لحد اللحين لما احس اني فاقدتها اتذكر الحلم
واتذكر الضمه ، واتخيلها تضمني اللحين

الحمد لله يارب !

حتى لو رحلوا من الدنيا ،
ادعو لهم ، ادعوا لهم
هذا من برهم ،
تراهم ينبسطون كثيييير !
ويتفاخرون بالقبور ، ان محد نساهم ، ولحد اللحين الناس تذكرهم
الله يخليكم لاتنسونهم

تحياتي لكم ،
مـــــرام ,

اشكر على التصميم
نورة ,