يبه وأنا بعد عشرين عام حسيت
اني قدرت أقول شيٍ كتمته
ابطى قصيدي ما أنكتب فيك وابطيت
اجر صوتي وارجع اجر صمته
ما ودي اكتب بيت واندم على بيت
ماهو بشعر .. الشعر كاني زهمته
الشعر كانه ما انحنى لي ما جيت
إن ماعزم مرثيتك ما عزمته
إن ماكتبته بأزرق الدمع وأبكيت
كل الجروح المبطيه ما رحمته
يبه وأنا من بعدك أبو التناهيت
ما مر طعمٍ للحزن مانهمته
يبه .. (يبه) كلمه وأنا كل ما أوحيت
كلمة يبه ((صديت والوقت لمته))
يبه .. (يبه) كلمه وأنا كم تمنيت
اهدم بها وابني بها اللي هدمته
يبه وأنا لاضقت رحت وتهجيت
ركون بيت ضم حلمٍ حلمته
يومك تعلمني ولامن تحاكيت
درس الحياه اللي كبرت وفهمته
هناك كانت دلتك لاتقهويت
وهناك كان يساق طيبٍ حشمته
وهناك إيه اذكرني .. هناك خليت
طفلٍ ملى بالدمع دربٍ رسمته
هناك جاني علمك انك توفيت
وهناك خاويت الشقا واحتزمته
واليوم قلت اليوم يومي ومديت
كف القصيد وطاح شعر ونظمته
لكن بعد صمت عشرين عام حسيت
اني عجزت أقول شيٍ كتمته
الكتابه التي باللون بالأحمر
تم تعديلها من قبلي
الضوء : أنا
الحرف : الشاعر فهد المساعد
رحمك الله يا والدي