حاول الإنسان كثيرا بناء تصنيفات للشخصيه
وهالموضوع شخصياً أقدر أسمي نفسي باحثه بسيطه في مجالاته لأنه يجوز لي 
يعني من الحين اقول لكم موضوعي طويل شوي فكالعاده اللي عنده شغل
يتوكل يسويه قبل يجي * لو تفكرنا بسير العظماء بنشوف أنهم يحصلون على مبتغاتهم عن طريق فهم الناس !
ناخذ مثآل : الرسّول صلى الله عليه وسلّم لما دخل مكه جاءه عمه العبّاس
قال يارسول الله
إن أبا سفيان رجل يحب الشرف ..
( يعني يحب يكون له سياده وسيطره) 
! فقال صلى الله عليه وسلّم " من دخل الحرم فهو آمن , ومن دخل بيته فهو آمن ،
ومن دخل بيت أبا سفيان فهو آمن " ..
ليه الرسول صلى الله عليه وسلّم قال كذآ؟ من عبث ؟ لا طبعا 
لأن أبا سفيان يوم سمعها حس بالشرف وبالمكانه ,
هالمقوله ألفت قلبه على الرسول صلى الله عليه وسلّم وعلى الإسلام وهنا المقصد .. 
طيب شوفو أبا سفيان لما رجع لقومه وش قال : "
ياقومي إن محمداً أتاكم بجنود لاقبل لكم بها فمن دخل يبتي فهو آمن
" لاحظوا ماقال الحرم والبيت لأنه يبي المكانه يبي الشرف له! قالوا له " مانفعل في بيتك ! " استبرك وقال من دخل الحرم وهو آمن ومن آغلق عليه داره فهو آمن ..
لآحظوا الرسول صلى الله عليه وسلّم كيف أثّر بقلب أبو سفيان من خلال شي يحبه *قسمت اخصائية علم النفس رينيه بارون في كتابها "9 شخصيات , 9 طرق للنجاح" .. الشخصيه لـ 9 تصنيفات
والعالم هيرمن قسمها الى A , B , C , D
وهناك من نظر الى فصائل الدم او من خلال الثقافات شمالي , جنوبي , شرقي ,غربي
لكن المدرب "ياسر الحزيمي" اختصر لنا الشخصيات باربع اشكال هندسيه وتحليله يعتبر مختصر اكثر من غيره ..!
المربع – الدائره – المثلث – المتعرج
رغم اني اكره شي عندي الاشكال الهندسيه 
لكن نشوف وش يقول ياسر عن هالاشكال
-حذرين 
-يقدسون النظام 
-اذا رحتو رحله بريه يصبحون متعبين معكم يعيقون اندفاعكم للمغامره 
لاتروحون لاتبعدون لاتطعسون لاتوسخون ملابسكم لاتخلصون الماء " 
طيب حنا طالعين بنستانس وبنطلع كل اللي بخواطرنا ليش النكد !!
لكن يصلحون بالحج لان الحج يحتاج لتنظيم في الوقت والاماكن وكل شي
-جادين ولايحبون الهزل والتنكيت لان يعتبرون انه خروج عن النظام 
يقول الدكتور من كان مديره من النمط المربع الله يدخله الجنه بغير حساب لانهم يكونون دقيقين بكل شي وممكن يخليك تعيد بحثك عشان الخط او ممكن ينشبون لك بالهمزات 
-يهتمون بالصحه والتغذيه وهذا يسبب كذا وهذا يجيب كذا وماالى ذلك من التعقيد خخخخ
-يهتمون بالوقت والمواعيد -لديه حده وخصوصيه يعني اكثر كلامه بيني وبينك حتى لو مايسوى " بيني وبينك رحت اليوم للبقاله اليوم " خخخ
- تفكيرهم أما أبيض أو أسود , ماعندهم وسط وماعندهم خيارات كثير ..
- يقدمون النظره التشائوميه قبل التفائوليه
تقدر تحدد الشخصيه من خلال شكل الجزمات عند بوابة المسجد
- بعض الناس يفصَخ جزماته " أعزكم الله " ويرتبهم جنب بعض ويحطهم بعيد , هذولا مربعات وبعضهم يشوتهن ولا كل وحده بجهه وإذا طلعتوا يجمع البزران اللي يلقى الجزمه له 10 ريال
ومثل اللي يصفون التمر بالعلب حبّه حبّه ما يكبونه التمر فوق بعض
-ودود .. عنده عواطف عاليه وغير طبيعيه - يصعب عليه ان يقول لا -يحب الآخرين فيه ليونه جسديه لما يكلمك يقرب منك أو يمسك يدينك -نيته صافيه لكن دائما يطيح بماآزق ..
-اهم شي عنده راي الناس ورضاهم لو كان على حساب نفسه !
-يشعرك بطفولته لما تقدر ترفع معنوياته بكلمه وتحطمه بكلمه 
- مايحب ولا يصلح يكون قائد أو رئيس مايحب يكون ضد أحد
* يقولون كان فيه قاضي من صنف الدائره يحكم بين اثنين
فهذا يصرخ فيقول له انت صح فيبكي الثاني فيقول انت صح فالثاني يتكلم فقال انت صح
فكان فيه مساعد جنبه قال ياشيخ مايصلح هذا صح وهذا صح وهذا صح قال أي انت صح بعد 
- مواعيده غير دقيقه .. لانه وان كان مواعد احد بالساعه الفلانيه ومر عليه صديقه
راح يجلس يسولف معه ويضيفه لانه لايحب ان يجرح مشاعر احد او يخسر احد
لكنه بالنهايه يمكن يخسر الاثنين !
-البنت دايم تحلم بزوج دائري حنون يعطي الآخرين ولا يعطي نفسه مايزعلها ويهمه رايه..
الواقع لو إعتبر زوجته نفسه ماراح يريحها وبيتعبها ويوهقها .. لو إعتبر زوجته ناس يآ سلآم فاللي زوجها دائري تحاول تحسسه أحيانا بشوي رسميه 
تحسسه إنه زي الناس ممكن تزعل ممكن تتضايق منه عشان يحطها بباله ويعاملها زي الناس
- " المثلث شعاره في الحياة اما ان تقود او تقاد او ابعد عن الطريق "
-اناس يبحثون عن مصالحهم وكل شي يخدم اهدافهم
-في نظراتهم حده يطيل النظر اليك يعني يبحلتز 
-حركاته مشدوده وهذا يدل ع الشده في التفكير 
-اناس لايصدقون الا بالبراهين والارقام كلمة يقولون عنده ماتمشي -مخططين رائعين لكن فاشلين في التنفيذ :/
-حارين بلهجتنا يعني لو كلفك بشي راح يقلقك بكثر الاتصال عليك والزن -اصحاب سخريه عاليه
* كآن فيه معلم دائم يتأخر وبايعها وإذا جا وقع جنب 7 وربع ولآ من شاف ولآ من دري
يوم من الآيآم هدآه الله وقرر يتوب وعفا الله عما سلف, وجا ودخل غرفة المدير وسلم على الحاضرين ووشلونكم ووش آخباركم آخذ حول الدقيقتين
يوم جا يوقع إلتفت على المدير : قال له أوقع بالوقت اللي دخلت فيه ولآ هالحين؟ المدير قال : الله واكبر تاكل بعير وتشرق بريقك يآرآقل وقفت عاليوم يعني مسوي لي زحمه عند دقيقتين المعلم حس بالمهزله صدق لكنه مشاها وأخذها مزح والحمد لله مادقق -جدلي وسريع الانفعال
-يحبون السيطره والقياده 
-ممكن يئذون من يقف امام اهدافهم
-يحتكون بالمسؤلين واصحاب المكانه لكن مو معناته مصلحجيين لا !
-يشتري الماركات ولايبخل ع نفسه لكن ربما يبخل ع غيره !
-يفرقون بين العواطف وبين مايجب ان يكون * اذا اخوك مثلا كان مثلث وارسلك تجيب شي وقال لك هاه جبت الغرض ؟
هو مايبي تقول والله رحت ولقيت فلان ومادري ايش هو مايبي القشور يبي النتيجه
راح يقول لك طيب جبته والا لا ؟ 
- شعاره " أمسكني إن إستطعت" منطلق ومندفع - يكره الروتين
- مثير , يحب التغيير
- يحب التميز , ويبحث عن الجديد - مايحب يقعد ببيته يطلع ويشوف ويسافر ويفتش ويدور شي جديد
- ماتهمه أهدافه ولا علاقاته ولا النظام
- يعني شوي إستهتار بكل شي بسبيل أوصل للتميز ..
- أهم شي عنده فكرتي فكره جديده ومثيره ومميزه بذاته اومحد جربها قبلي خلاص
-
بالنهايه حاولو تفهمون شخصيات بعضكم خصوصا اللي مرتبطين معهم مدى الحياة وبشكل يومي ..
والديكم اخوانكم ازواجكم اصدقائكم عشان تقدرون تفهمونهم وتتعاملون معهم وتلتمسون العذر لتفكيرهم
وانماطهم اللي ماتعجبكم ..!
وبس 
حبيت اكتب هالموضوع بما انه من زمان ببالي ومن زمان عنكم مع اني عارفه ان ماحولي احد على قولة بعض الناس ..
تافهين صح 
ماعليكم منهم وجاوبو على اسئلة الموضوع : ● أي نمط حسيتو نفسكم قريبين له؟
● صنفو من حولكم بالنمط اللي حسيتو يناسبهم !
لاانسى الشكر كل الشكر للبرنسيسه :
ĐąหṯёёŁ